Netanyahu-a’n Trump-a leh Iran an inrem theih beisei

Israeli Prime Minister Benjamin Netanyahu-a chuan US President Donald Trump-a chuan sipai chakna hman ngai lova Iran nena inremna a siam theih a beisei tih a sawi.
Netanyahu-a hian Nilaini khan Washington-ah Trump-a hmuin inremna siam a nih chuan ‘Israel tan pawha pawimawh tak a tel ang’ tih a sawi.
Iran-in nuclear programme a tihtawp te, ballistic missile a siam zat bi tuk leh Iran-in hel pawl a thawhpui tihtawp te pawh a tel dawn niin a sawi.
Tun tuma an inkawm hi nikuma Trump-a a president leh hnua a vawi sarihna a ni ta a. Netanyahu-a tun tum zin hi tum dang aia thawm lian lo niin chanchinbu mite pawh a kawm lo va, Zirtawpnia Oman-a US leh Iran an inbiak tak bik ngawr ngawr an sawi a ni.
“Tun tuma a indawr danah hian, a hmaa inremna siam thei lova tih sual an neihte thlir tel chungin duan a ni a, hlawhtlinna a awm theih tawhna tur a awm a rinawm,” tiin Netanyahu-a chuan a sawi.
Hruaitu pahnihte hi tumah tihbuai lohvin darkar hnih leh a chanve chuang an inkawm a, Trump-a chuan ‘inkawmna hlawk tak’ tiin a sawi zui a, thutlukna lian engmah an siam lo tih a sawi bawk.
“Inpawh takin kan inkawm,” tiin Netanyahu-a pawhin a sawi a, eng thilte nge an sawi a sawi lo va; mahse, Iran nena inbiakna erawh an thlurbing a, Trump-a hian ‘ka ngaihdan hriat a duh’ tiin a sawi.
“President hian Iranian-te hian tute nge an dawr tih an hre tawh tih a sawi,” tiin US-in an nuclear hmunte an beih hnua ni 12 chhung Israel leh Iran indo a sawi chhuak a ni.
Trump-a hian inremna a awm loh chuan Iran hi kahah a vau va, Tehran pawhin Middle East-a US sipai awmte beihah a vau ve bawk.
Iran hian an nuclear program hi an laka hrekna hlih a nih chuan tihtawp an duh tih an sawi a, missile an siam nena inzawmna erawh a nei lo tih an sawi thung.