Netherlands an chak nuamsa

Thawhleh zan khan Europe atanga World Cup 2026 khel tur zawnna khelh chhunzawm a ni a. Netherland chuan an mikhual Malta chu 8-0 ngawtin an sawp a, nuamsa takin an chak. Netherlands chak rual hian Finland pawhin hnehna an chang a, Group G-ah hma an hruai chhunzawm zel.
Football a thawm nei lian tak ni reng chunga inelna liana champion harsat tlat si Netherlands hian Euroborg mualah Malta an mikhual. Mizorama zaithiam group pakhat ‘MALTA’ lo zawk; Europe a ram pakhat Malta hi an ngam hle a, si riat fai tehrengin an lo sawp a, match hnih atangin point ruk an hmu.
Mualneitu Netherlands hian an mualah an bul an tan tha viau a, penalty an hlawhchhuak nghal thuai, Minute 9-na leka penalty an hmuh chu Memphis Depay chuan harsatna tawk lovin a pet goal a, hmahruaina goal a thun. Hma takah goal an thun vangin an phur a, an mualah an khel tha zui viau nghe nghe. Hmahruaina goal thuntu Depay hian minute 16-naah an goal hnihna a thun belh zui leh a, an hmahruaina a tizau. Dapay goal hnih thun hnu hian Liverpool defender Virgil van Dijk chuan minute 20-na lekah an goal thumna a thun belh zui leh ta mai a, an khingpuite lamah an pet goal zawt zawt a ni ber mai. Holand hian an khingpuite ngam zui viau mah se chawlhlawk hmain goal dang an thun belh thei lova, 3-0 a hmahruai chungin chawlhlawk an hmang.
Chawlhlawk hnu lamah Netherlands an khel tha leh zual a, gial nga ngawt an thun belh. Xavi Simons chuan minute 61-naah an goal lina thunin an hmahruaina a tihzau belh a. Simons goal thun hnu hian Donyell Malen chuan minute 74 leh 80-ahte goal thunin goal hnih a thun zui a. Malen bakah hian Noa Lang leh Micky van de Ven ten goal khat ve ve an thun zui leh a, an mualah 8-0 ngawtin an chak zui ta a ni.
World Cup khel tur zawnnaah Netherlands hian vawi hnih chauh an la khel a, an khelh tawhah hnehna an la chang ve ve. Neherlands hian khelh hnih atanga point ruk an hmuh bakah an khingpuite lakah goal 10 ngawt thun tawhin goal an la chhuah lo. An chunga awm mek Finland chu point khatin an la phak lova, Finaland ai hian vawi hnihin an khel tlem zawk thung a, Netherlands hian World Cup khelh theihna hun tha tak an nei.
Netherlands in awlsam taka hnehna an chan rual hian an Group-a hmahruai mektu Finland chuan Helsinki Olympic Stadium-a an mikhual Poland chu 2-1 in an lo hneh a, point thum hlu tak an hmuh belh.
Finland tan hian Joel Pohjanpalo chuan minute 31-naah penalty atangin hmahruaina goal a thun a. Chawlhlawk hnu lamah Benjamin Kallman chuan an goal hnihna a thun belh leh bawk. Si hniha an hnufual hnuin Poland tan Arsenal defender akub Kiwior chuan minute 69-naah goal thunin an si phurh a sut then naa, Finland lakah tlawm an pumpelh zo ta chuang lo thung.