New Zealand an chak chiang

India ram khawpui hrang hrangah Cricket World Cup 2023 khelh chhunzawm zel a ni. Tlawm nei lova kaltluang New Zealand an khel tha chhunzawm a, an khingpui Afghanistan chu run 149 zetin an hneh.
Vawi thum chak zawn tawh New Zealand hian Afghanistan an hmachhawn tumin an vaw hmasa a, over 50-ah run 288 an siam a, mi paruk chiah an out. An khingpuite tan targer hautak tak an hnutchhiah a, England hnehtu Afghanistan tan lehpel har viau tura ngaih a ni. New Zealand tan hian Glenn Phillips chuan ball 80 a hmachhawn atangin run 71 a siam a. Tom Latham-a’n ball 74 atanga run 68 a siam bakah Will Young chuan ball 64 atangin run 54 a thawkchhuak ve bawk.
Champion lai England timualphotu Afghanista vuak hun a thleng a, New Zealand Bowler ngam lovin an thi zawih zawih a ni ber mai. Over 34 leh ball li a nih meuh chuan an thi zo vek a, run 139 bak an vawchhuak thei lo. Champion lai England meuh hneha an boruak a len hluai hnuin New Zealand lakah an mualpho zui leh zat a, New Zealand lakah hian run 149 zet in an tlawm a ni. New Zealand laka an mualpho tum hian Afghanistan tan Rahmat Shah chuan ball 62 atangin run 36 a siam a, a ni hi run thawkchhuak hnem ber a ni.
Afghanistan lakah awlsam taka an chak leh tak vangin New Zealand hi khelh li an chak zawn ta chiah a, point hmuin inelna thlengtu India an lehpel a, table chung ber an luah. He thu buatsaih lai hian India leh Bangladesh an inhmachhawn mek a, India hian Bangladesh run siam 257 an um mek.