Newcastle in Arsenal an hneh nawn leh

February 5, Nilaini zan khan English Carabao Cup semi-final thawh hnihna khelh a ni a. Newcastle United chuan Mimuala an lo hneh tawh Arsenal chu an mualah si hnih fai bawkin an hneh nawn leh a. Si belhkhawmah 4-0 ngawta hnehna changin Newcastle United in final an lut.
Semi-final thawhkhatnaah Newcastle United hi Arsenal mual Emirates Stadium-ah an leng lut a. EPL-a khel tha Arsenal hi an mualah chak tura rin zawk ni bawk mah se inlehthalna lian tak a thleng a, an mualah ngei Laipui an tipuak thei lova, si fai ngawtin an tlawm. An muala tlawm hmasa an nih vangin Arsenal tan final luh beiseina a chuai hle naa beiseina mei de set set erawh a la mit hmiah bik lo thung. An beiseina mei de chhit en zual tumin St James Park-ah lenglut mah se si hnih bawkin an tlawm leh ta si a. Carabao Cup final luh an beiseina chu sarah a zam ral a, next season bawk an thlir mai a ngaih leh phah ta a ni.
English Premier League-ah paruknaa awm mek Newcastle United hian chak nawn leh ngei tumin an mikhual Arsenal an hmachhawn a, an mualah an khel tha a, goal pawh an thun hma hle. Arsenal ngei pawhin lei an duh em em Alexander Isak chuan inkhel tan atanga reilote-ah goal a thun a. Isak goal thun hi offside vangin pawm a ni lova, Arsenal an him phawt. Magpies goal hmasa hnawl a nih vangin Arsenal him bawk mah se an him rei chuang lo. Gunners hian Captain Martin Odegaard hmangin goal an thun teuh hle a, uiawm takin an hun tha neih an hlah.
Arsenal in an hun tha neih an hlah hnuin Newcastle in an nawr let a, goal an thun. Inkhel tan atanga minute 19-na lekah Isak chuan hun tha a nei a, goal bar a pet per hlauh thung. Heta ball per let leh hi Jacob Murphy chuan awlsam takin goal ruakah a lo pet goal a, minute 19-naah hmahruaina goal a thun.
2-0 a hmahruai chunga goal thun hmasa zawk an nih vangin Newcastle dinhmun a tha tawh hle. Arsenal hian an si phurh sut tumin tan khawh chiam thin mah se an hlawhtling zo lova, goal an chhuah belh leh ta zawk. Second half atanga rei lo, minute 52-na lekah Anthony Gordon chuan an goal hnihna a thun zui leh a. Hun tawp thlenga goal lut loh vangin Newcastle United hian Arsenal chu 4-0 in an dahtha a, final an lut zui ta a ni. Newcastle hian kum 56 zet hnuah trophy lian lak theihna remchang an nei mek a. Final-ah Liverpool leh Tottenham te inkhela chak zawk zawk an hmachhawn zui leh a. Wembley Stadium-ah ngei champion tumin tan an khawh ang. Liverpool leh Tottenham te hian nizan khan semi-final thawhhnihna an khel a. Result kan tarlang hman lo. Reds ha thawh khatnaah 1-0 in an chak tawh thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More