Thawhtan zan khan English Premier League khelh chhunzawm niin inkhel pakhat a awm a, 3-0 a Leicester City hnehtu Newcastle United in Manchester City an lehpel a, panganaah an inhlangkai. Newcastle in hma an sawn laiin Leicester City erawh chuan tlakhniam an hnaih zual deuh deuh thung.
City lehpel tur chak mamawh Newcastle United hi table hnuai ber dawttu a awm mek Leicester City hmachhawn turin King Power Stadium-ah an leng lut. An lenluhna mualah bul an tan tha viau a, goal an thun hma hle. Inkhel tan atanga minute hnihna lekah Jacob Murphy chuan hmahruaina goal a thun nghal. Hma takah goal an thun vangin an phur a, inrintawkna sang zawk nen mualneitu team talbuai mek an nawr zui a, goal an thun belh leh thuai. Goal hmahruai an thun atanga minute 9 hnu lekah Jacob Murphy chuan an goal hnihna a thun belh zui leh zat.
Hma takah goal hnih an thun vangin Newcastle United an phur tak zet a. He tihlai hian hma taka goal hnih an chhuah vangin Lecester City an talbuai ve tak zet thung a, King Power Stadium a team hnihte dinhmun a inthlau hle. Foxes hian him beisei thei turin point mamawh viau mah se goal an thun thei lova, goal an chhuah belh leh tlat thung. Chawlhlawk dawn hnaih minute 34-naah Harvey Barnes chuan Newcastle goal thumna a thun a, Magpies hian 3-0 a hmahruai chungin chawlhlawk an hmang.
Chawlhlawk hnu lamah inkhel hmuhnawm zui viau mah se goal dang a luh belh thei tawh lo. Foxes laka point thum an hmuh hmangin Newcastle hian Manchester City an lehpel a, panganaah an inhlangkai.
Newcastle in Man. City an lehpel
Get real time updates directly on you device, subscribe now.
Prev Post