Newcastle in United an hneh

April 2, Pathianni zan khan English Premier League 2022-23 ah inkhel ngaihven hlawh tak a awm a, St James Park-ah Newcastle United leh Manchester United te an inkhel. He inkhel hi pathumna nih inchuhna ang hiala pawimawh a ni a, inkhel pawimawh takah Newcastle United in si hnih faiin hnehna an chang a, pathumna an luah zui nghal. Inkhel dangah West Ham United in Southampton an hneh a, tlak hniam theihna hmun him lo an chuahsan.
Newcastle in phuba an la
St James Park a inhmachhawn Newcastle United leh Manchester United te hi February ni 23 khan Carabao Cup final-ah an lo inhmachhawn tawh a. Wembley-a inkhel hmuhnawm takah si hnih faiin Manchester United an chak a, kum ruk hnuah trophy an la. Carabao Cup final-a an hneh loh United lakah Newcastle hian phuba an la a, Wembley-a an tlawmna zat chiahin an mualah hnehna an chang.
Palinaa awm Newcastle hian an mualah bul an tan tha a, United aiin hlauhawm an siam hnem zawk. Chawlhlawk hmain goal thun theihna hun tha vawi hnih an nei a. Alexander Isak leh Joe Willock te hun tha neih chu si nghak David de Gea chuan ropui zetin a dansak a, an team a chhanhim. Chawlhlawk hma hian United tan Wout Weghorst chuan goal thun theihna hun tha a nei naa, a hun tha a hlah ve bawk a. Chawlhlawk hmain goal thun thei an awm lo.
Chawlhlawk hnu lamah Newcastle an khel tha chhunzawm a, goal hnih an thun zui ta nghe nghe. Minute 65-naah Joe Willock chuan Saint-Maximin siamsak tha tak chu goal-ah a chantir a, hmahruaina goal a thun. Hmahruaina goal an thun hnuin inrintawkna sang zawk nen an inlan chhunzawm a, an khel tha zui viau.
Mimualah point hlawhchhuak a, pathumna luah chhunzawm tumin United in tan an khawh a, goal thun tumin thapui an thawh. Goal thun ngei tuma tan an khawh laiin goal an chhuah belh leh ta tlat thung. Hun tawp dawn hnaih minute 88-naah Callum Wilson chuan denfender Trippier siamsak atangin an goal hnihna a thun a, an hma-hruaina a sawh nghet. Wilson goal thun hnu hian goal dang a luh belh thei tawh lova, Newcastle United chuan an elpui lian tak Manchester United lakah hnehna pawimawh tak an chang zui ta a ni.
United lakah hnehna pawimawh tak an chan vangin Newcastle hian an chunga awm United hi an lehpel a, pathum naah an inhlangkai. Kum 2002-03 hnu lamah Magpies hian EPL top 4 huang an luah phak ta miah lo va, season kal mekah erawh top 4 huang luah phak theihna hun tha tak an nei mek. Newcastle hian khelh 27 atangin point 50 an hmu mek a. An lehpelh tak United nen khelh inzatah point 50 ve ve hmu mahse goal diference-ah Newcastle hi an that fal em vangin a chung zawkah an awm.
West Ham an chak, Moyes a him rih
Pathianni zana inkhel dangah table hnuai lama awm pahnih West Ham United leh Southampton an inhmachhawn a. Mualneitu Hammers in si khat faia hnehna changin relegation zone an chhuahsan a. An mualah tlawm se ban tawk mai tur manager David Moyes chu ban tawk em lovin a him phah bawk.
18-naah awm a, tlahniam thei dinhmuna ding mek West Ham in table mawngphah Southampton an hmachhawn tum hian minute 25-naah Thilo Kehrer-a’n hmahruaina goal a tauh lut a. Kehrer goal thun hmang hian hnehna pawimawh tak an chang. Saints laka point thum an hmuh hmangin Hammers hi 14-naah an inhlangkai dawrh. Hetihlai hian Saints hian tlakhniam an hnaih ve zel thung.