Neymar leh Robinho Jr te an inrem ta

Santos player pahnih Neymar leh Robinho Jr te inkarah inhmuhthiamlohna lian tak a awm a. Neymar hian thpha a chawi lo a nih chuan Santos chhuahsan hial a tum thu Robinho Jr chuan a sawi. Robinho Jr phut ang ngeiin Neymar chuan khawvel hriatah thupha a chawi ta nge nge.
Thil thleng chu
Santos leh Palreiras te an inkhelh zawhah Santos tana inlan phak lo (reserve team) ten training an nei a. He training naa hian Santosh Jr chuan a thiam lantirin Neymar kapkar-ah ball a pet lut kual vel a. Mood fuh lo sa Neymar chuan chu thil chu ngai thei lovin Brazil tana a kelhpui thin Robinho fapa Robinho Jr hi a thil tih chu ‘awlsam lutuk’ tiin a elsen phawt a. Deu taka a tawngkhum hnuin an inhnial zui ta nia sawi a ni.
Mipa leh mipa, ‘kei ka ni’ inti ngat chin inhnial chu tawngka maiin a daih lova, an innam tawn ta a. Insum thei lo zawk Neymar chuan Robinho Jr hmaiah hian a beng a, a pet thlu zui bawk nia sawi a ni. Hei hi thil thlen dan chu a ni.
A nghawng
A laka Neymar a chet dangah hian Robinho Jr a lawm lo hle a, club thuneitute hnenah lungawilohna a thlen zui ta hial. Club thuneitute laka a zualko bakah Neymar hi ngaihdam dil turin a phut tel bawk.
Club thuneitute pawhin an chhui zui nghal vat bawk. Neymar hian thiam loh a chang a nih chuan sum tam tak chawi thei a ni a. Hremna na zawk a contract tihtawp thlenga hrem theih a ni cheu bawk. Rinaia boruak a len a, thil a kal thui tak vangin Neymar pawhin kum 18 mi Robinho lakah ngaihdam a dil ta nge nge a ni?
Ngaihdam dilna chu
A thil tihin nghawng pawi tak thei tak a neih tak vangin kum 34 Neymar chuan ngaihdam a dil ta nge nge. “Ka chhanlet dan kha a lo uchuak lu deuh a ni. Ka insum hman lova, ka chhang let na ta lutuk a ni. Mitinte hian tihsual kan nei vek a, he thil thleng hi keima tihsual a ni a, ka tihsual liau liau, ka tihsual lian tak a ni. Ani hi ka naupang ngainat tak mai a ni. Hei hi football a thilthleng, thian leh unau kara thleng a ni. Football a thleng fo thin a ni nain ka thiam loh a ni tih ka pawm e. Thuthar thehdarhtute hmaah ngaihdam dil i phut ang ngeiin hei ka ti ta e,” a ti.
Robinho Jr pawhin thu leh hla a nei nghal thuai a, “Neymar hi ka idol a ni a, khatianga a che ta mai khan min thawn hman hle. ‘Khual thuthang leh Ar pan chuk’ an tih thin angin sawi neuh neuh a tam zui lutuk a, thu a vung zui ta vak ve bawk a ni. Kan inbia a, engkim kan sawi dun a, kan inkar a tha ta vek e. Neymar hi ka ngaina tak zet a ni,” tiin a sawi ve bawk.
An inrem ta
An inhmuthiam lova, boruak duhawm lo tak an nei a, an boruak a len hluai hnuin Santos hian Copa Sudamericana match-a Recoleta an hmachhawn tumin Neymar hian goal a thun a. A goal thun lawm nan Robinho Jr hi pan vang vangin a kuah a, chu chuan an inremna tih a lantir.
Neymar leh Ronbinho Jr te an inrem tawh e!