Ngaihven hlawh Group B

Euro 2024 a intum tur pawh fel a ni ta a, Group B-ah champion lai Italy in Spain leh Croatia an awmpui a. Group B hi Group ngaihven hlawh an ni ngei dawn.
Group B-ah hian Euro leh World Cup-a champion tawh pahnih Italy leh Spain an awm a. World Cup final khel tawh, tunhnaia che chhe tak tak ngai lo Croatia an awm bawk. An ni pathum hian group champion nih an inchuh a ngai dawn a, an group hi a hmuhnawm lo thei lo. Italy, Spain leh Croatia te an lansarh laiin Albania erawh chu point box tura ngaih an ni thung. Group B hi Euro 2024 bikah chuan ‘Group of death’ tia sawi theih deuh ber a ni ang a. Anni group atanga tlang hi chu champion tura rinkai an ni zui ngei bawk ang.
Group B-ah bakah hian Group D-ah champion tura rinkai pahnih Netherlands leh France an awm tlang bawk. Anni pahnih Euro khel tur zawnnaah group khatah an lo awm tlang tawh bawk. Tunhnaia an inkhelh dan ngaihtuahin France hi group champion an nih a rinawm zawk a, Netherlands kawng a khirh zawk tura ngaih a ni. Group D-ah hian Austria an awm bawk a, an ni pawh hi vanneiha tlang khur thei an ni ve bawk a. France, Netherlands leh Austria bakah Group D-ah hian playoff atanga tlang an awm belh bawk ang.
Team boruak nei lian tak England chu group C-ah awmin, Slovenia, Denmark leh Serbia te nen an awm tlang a. Three Lions tan hian last 16 luh a harsat lutuk a rinawm loh a, group champion an nih ngei a rinawm. Euro 2024 khel tur zawnnaa chak vek awmchhun Portugal chu Turkey leh Czech Republic te nen an awm tlang a, playoff atangin an belh leh dawn bawk. Portugal tan pawh last 16 luh a harsa lo tura ngaih a ni. Inelna thlengtu Germany chu Scotland, Hungary leh Switzerland te nen Group A-ah an awm tlang. Germany tan last 16 luh a harsa dawn lo va. Jullian Nagelsmann hnuaia chetha lo Germany hian last 16-ah Spain emaw, Italy emaw zawk zawk hmachhawn zui thei dinhmunah an ding thung.
Euro 2024 hi June 14, 2024 ah Allianz Arena-ah khelh tan a ni ang a, July 14-ah Berlin khawpui-a Olympiastadion-ah final khelh a ni thung ang. Italy in an trophy kawl mek humhim tumin thapui an thawh dawn a, an hmuhnawm khawp ang.
Euro 2024 Group
Group A: Germany, Scotland, Hungary, Switzerland
Group B: Spain, Croatia, Italy, Albania
Group C: Slovenia, Denmark, Serbia, England
Group D: Play-off winners A, Netherlands, Austria, France
Group E: Belgium, Slovakia, Romania, Play-off winners B
Group F: Turkey, Play-off winners C, Portugal, Czech Republic