R.Lalrinkima
Hidden Lodge
Chanmari, A izawl
-- Advertisement --
He khawvel hun chhiara kum 64 hmang zo, Zofate tana Lengzem, Lenglawng leh Pathian hla tam tak min hnutchhiahtu F.Lalthanliana, Thingsai Lal Fapa kutchhuak hian tun Krismas chu i hmang teh ang.
F.Thana chu
Pu F.Lalthanliana hian hla 100 chuang a phuah tawh a, Lenglawng lam tam berin Pathian hla hian a dawt a, Lengzem hi a tlem ber angin amahin LDF Interview naah sawi mah se a hla kan hriat tam zawk chu Lengzem a ni mai awm mange aw a tih theih awm e. Thingsai fa hrinah chuan a hlu ber pawl nia chhal ngam hian an khaw nula hla phuah thiam Saikuti kha Thingsaia a ruhro la chhuak a, Aizawl Museum-a mi tam zawkin a ruhro tal an tlawh theihna turin lak thlak a, Thingsai a chhuahsan ta kha ngaingam loin hlain a au chiam a, hun a liam deuh hnu feah chuan a au let ta nghe nghe a nih hi. He ruhro hi Aizawl a lo thlen khan Chanmari kawn chhak BOC peng tih thin bulah puandum sina school naupang ten an hmuahnaah khan ka tel ve nghe nghe a.
Hun a lokal zel a, F.Lalthanliana chuan Aizawl lamah a hna lama training neiin kan Inah a rawn khawsa a, tlai lamah hian ka guitar hi a perh a, a zai rut rut thin a. A guitar chord perh chu chik taka lo enin thiam ka lo tum ve thin a, a ningkhawng ka hriat phah ta reng a, ka theihnghilh thei tawh lo ang.
Saikuti hla
Sikul kan chawlh laiin tlai khat chu Lammualah 9th AR leh 58th GR football khel kan en dun a, inkhel kan en zo chu Aizawl Museum tlawh a duh thu min hrilh a, Saikuti ruhro chu kan en/tlawh a. Town Bus ZRM 1134 (chhangthawp Bus ti-a hriat lar thin)ah kan chuang haw a, in kan thleng chu Guitar a chuh nghal a, Saikuti, an khaw nula khaw danga a pem ta daih mai a uina hla a siam ta a. Chang 4(li) lai a siam a, zanriah kil hma chuan a duhtawk ta a. Zanriah kan kil zawh chuan, “Marin, enge ka hla thar chu a an awm?” min ti a, kei ve khanglang chuan ‘chang 3(thum) ni se, kham lo deuh hian sa ila, hla chu a hlu ka lo tih ve khanglan avangin chang 3(thum)ah chuan a sawr bing ta a. “He hla chu i ta ni se, i duh duh i saktir dawn nia” tiin zalenna min pe a. A training zawh hnu chuan Lunglei lamah min haw san a, kan farnu Sailothangi AIR ah Voice test turin Thingsulthliah atangin Aizawlah a lo chhuk a; hla ruahthamloh a duh thu a sawi takah chuan ka zirtir ta a, vanneihthlak takin Voice test naah chuan a tlinpui mai bakah recording te kan ti zui a. Rei lo teah Zoram dung leh vang a deng chhuak ta kha a ni a, tun thleng hian rual u deuh lam chuan an la hre hlawm viau ang tih ka ringhlel lo.
Khatianga hla thuril leh Thingsai ti Thingsaitu, ui-na
‘Engvang kher nge tui ang min pem san tak mai le,
Kirtiang i rel leh dawn em?’ a han ti te kha chhangtu tur awm tawh lo mah se zawhna ngenngawl tak chu a ni.
‘Zehlung i remna siahthing zarpui pawh,
A ai nem duai tuiang i pemsan tak ni khan;
Fam hial a chang ve mai awm? te a han ti zui meuh kha chu a ruhro mai tan pawh Thingsai lama haw leh nal nalna khawp a ni a, mahse, hetia zawttu hi Aizawl lama lak thlak reltu zingah khan a tel loh miau avangin hla mawi a ni ta mai a.
A changnawn-a
‘Tunah mi vangkhua i chang mai tur hi,
Kan phal lo che Zaihniang
Zaituahthiam!
Lamang leh lehin maw kan
chhuahtlang mual ngeiah,
Kirtiang i rel leh dawn em?’
a tih chu chungtiang vanrang chhum zing-ah a thamral mai mai lo tih hriat takin tunah chuan Zaihniang Zaituahthiami chuan an vangkhua Thingsai leilungah ngei a lu a nghat leh leh ta a nih kha!
Ruhro tlawh vawihnihna
He thu ka hriat hnu hian vawitekhat mah ka la tlawh ngai loh ‘Saikhawpui’ chu tlawh ngei tura turna na tak thlarau chuan Aizawl Museum-a vawikhat a ruhro ka hmuh hnu-a a zalna piallei dai ngei chu pan turin Chhimthlipui hrang ang mai hian min nawr sawk sawk a. Kei pa dawrawm chakna nei tlem tak chuan do zo loin Saikhawpui lam chu ka pan dawr dawr a. Fur hnukhawi lam a ni a, N.Vanlaiphai ka thlen chuan ka thiante hnenah kawng a tlang that leh that loh chu ka zawt a, a kal theih thu ka hriat hnu chuan he hla ngaithla chung chuan tlai Ni tlak leh Saikhawpui luh chu ka rual a. A tuk zingah Saihniang Zaituahthiami thlan chu ka tlawh ta a, ngaihtuahna leh suangtuahna zawng zawng chu Saikuti hla a lo pian chhoh danah chuan a kir leh vang vang a. A ko lettu lahin Van kohna chhanga piallei thuahriat dai hnuaia zala he Lei-a kir leh tawh lo tura 11.08.2013-a kan zalh ni te kha a lo lang uaih uaih a, a va lungrun thlak tak em ve aw!! Natna khumah chau tawh taka a awm thu ka farnu Enkawli’n min rawn hrilh a, rei lo te hnuah a chah thlak thu min rawn hrilh leh takah chuan thian zahoin a tuk vartianah Leitlangpui kan pan a. Ka farnu bulah ‘hei hi ka ruang chungah i sa dawn nia’ ti-a a hla zirtir ngei mai ‘Luiral Ram mawi’ chu sa turin koh a ni a. Sound system lam buai deuh avangin hun a khaihlak deuh nain amah thlahtuten tin zai rel loa chu hla ngei chu ngaihthlak an duh si a, kan awmhmun theuhah kan ngawi thup mai a. Thil a fel hnu chuan he mi ropui, mahni ruang chunga sak tura hla siamtu siam ngei hla chu Enkawli chuan a han sa ta a, mipui mittui sur zozaite kha mithlaah a ngai ang biaiin a lo lang uaih uaih a.
Halleluiah ropui se
Hetiang khawpa Khuanu malsawmna dawng, hlarua tha tak, awmze ril leh ngenngawl tak min hnutchhiahtu hian Sangau-ah (a ni leh kum chu ka hre ta lo) Pu F.Laltuaia Team-a Pathian rawngbawla Salvation camping an neih laiin Krismas an hmang zui a. Krismas tukah chuan khaw mi nawlpui Krismas lawma an phut suau suau laiin anni team chu an reh deuh dak mai a. Pu F.Laltuaia chuan, “Thana, hla te hi kan nei dawn em?” tiin fiamthu beisei nei tak hian a han ti a. Pu Thanliana lah chuan a talent hmang tangkaiin chawplehchilh tak mai chuan hla thiam sa, sak mai theih tura ziak ang mai chuan lehkhapuan la-in ziakfung a chawi a, he hla thu hi a ziak ta zung zung a-
‘Ngaiteh vawiin Van Lal fa pianni
Lawmin Van mipuite’n zai an rem.
Van Seraf leh Angel var rualten
Remna leng se tiin zai an sa.
A pianna Bawng In chu tlawm mah se,
Lei leh Van Lal ber Chhandamtu;
I fak ang u kan aw neih zawng nen,
Halleluiah Ropui se tiin.
Phul khawhar leh zan daifim nghak a
Berampute Beram ven laiin,
An hnenah Vantirhkoh inlarin
Hla mawiin Lal pian thu rawn hlan e.
Khawchhak mifing pawh Siar eng mawi
Zuiin Bethlehem Bawng In tlawmah,
An rohlu berte chu rawn chawiin
Lal thar piang chibai an rawn buk a” tiin.
Chawplehchilh tak mai chuan a thluk pawh chu siam nghalin hlimtak chuan Pu Tuaia leh a team te chuan an sa ta dual dual nghal niin an sawi. He hla lo pian dan leh a thluk en hian Pu Thana talent dawn ropuizia hi a lang chiang tak zet zet a ni.
Lal pianni-ah chuan Van mipuite, Van Seraf leh Angel var rual ten ‘Remna leng se’ tiin hla an sak thu-in bul a tan a. Tlawm taka Bawng In-a piang pianna chu tlawm mah se Lei leh Van Lal ber mai ni lo Chhandamtu tur chu kan aw neih zawng nena ‘Halleluiah, ropui ber rawh se’ tih leh Van mipuite,Van Seraf leh Angel var ten ‘Remna leng se’ tia zai an sak chu zawm ve turin min han sawm kauh a nih hi.
Phul hmun nuam tak mai hmun reh leh khawharthlak tak maia mi inngaitlawm, rinawm, taima leh huaisen Berampu te hnena Vantirhkoh tena hla-a Lal pian thu an han hrilh hriat hmasak bik vanneihziate hi a lo lang uarh uarh a, an va vannei bik tehlul lem! Vantihkohtena Lal pian thu an hrilhna tlaka Berampute chan ang hi kan chang phak ve ang em tih hi keimah ka inzawt thin, ‘ka chang pha lo, ka indah sang er awr lutuk, ka dawih bawk si’.
A, khawchhak mifing an lo lang, anmahni hruaitu Arsi eng an zui a nih hi.. Arsi eng chuan an kalna tur hi a hrilhfiah nghal em maw ni tih tur a ni, an rohlu ber te chawiin Arsi eng chu Bawng In tlawm tak thleng chuan zuiin Lal thar piang chu Chibai an buk nghal zuk nia maw le? ‘Lal thar’ tih hre tur khawpa mifing an ni mauh a nih hmel e, nge an zui Arsi hian a hrilhru se se ni ang le? Keini ni ve ta ila, kan lirthei changkang tak tak te chuan Lal thar lo pian dawn zanah chuan khawilai party leh huau huauna hmunah Lal thar lo piang hre lek loin min han hruai a, kan han nawi nak nak khawp mai si-ah, chibai kan buk te chu tunge a nih kan hre lo hulhual a. Kan Lal thar lo piang tur kan hmuah dan hi zawng hmuak fuh aiin hmuak fuh lo kan tam zawk thin hian ka ring thin?
Lal piancham hlate hi
A ni tak e, he hla hi A pianni chiaha sak chi a ni a, a lo thlen hmaa sak a rem chiam lo a, a pian hnua sak a rem chiam chuang lo nain Lal pian cham lo hnai tih min hrilhtu Tlaizawng par leh Tlangsam par te an lo vul tawh chuan a sak theih vek tawh awm e.
Khualbuk vengtu rinawm
Han sawi takah chuan Lalpa remruat ang ngeia lo piang tur kha Thlarau Thianghlim khan Josefa nen an inhual laiin Mari chu nau a paitir a. Josefa chu mifel tak niin Mari naupai chu tlangthan tir a duh loh avangin bansan mai a duh rum rum a nih kha. Nimahsela, Thlarau Thianghlim chuan a hnenah thu a sawi takah chuan Josefa pawh chuan a rilru a thlak ta nghal a. Kaisara Augusta thupek angin mahni khua theuha hming ziak turin Nazareth khua atangin Bethlehem khua chu Mari rai tawh teuh nen chuan an pan ve a. Hmun dang atanga Bethlehem lama hming ziak tur kal an tam tham avangin Khualbuk pawh a lun hle a, Khualbukah chuan thlen chu dil nasa teh mah se Khualbuk vengtu khan hmun a awm loh thu a hrilh avang leh Mari chuan a naupai hrin a hun tawh em avangin Bawng In tlawmtaka nau hring tur chuan an inbuatsaih ta a. He Khualbuk vengtu hian Lal lo piang tur tih a hre lo a, hrilh a ni bawk lo a, a hnar pawh a ni lo a; hmun a awm tawh ngang si lova hmundang pan ta mai kha an ni a. Krismas boruakin min han chim chhoh tak leh Krismas lo thlen thleng mai chuan Khualbuk vengtu rinawm leh diktak mai hi ‘suihlungmawlah’ kan chhuah chamchi ta mai thin si a!
Krismas hlasak hun chhung
Krismas hlate hi Lal lo pian hma boruak chho vela sak chi te, A pianni taka sak chi te a awm nuk mai, mahse, kan Lal thar lo piang tur boruak leh a hnu lam boruak hian zofate thinlungah hmun a luah thuk em em a, ni rei loh hun a lo ni nen kan hmang liam zung zung mai a, Lal pian tawh hnuah pawh ‘Rem Lal pian hun champha hmatiangah kan thlir’ tiin kham lo takin Lal piancham chu kan thlah thin a nih hi!! Ocober thla a lo herchhuah hi chuan kei hi chu tih chawmawlh deuh roh hian ka awm tan a, Lal pian hun lam hla te hi ngaithla tanin kham lo takin thla thum chu ka hmangral leh mai thin.
Engapawh chu ni se kan Lal thar lo piangin he hla kan tarlan taka thuhma anga a neih Van mipuite, Van Seraf te leh Angel var rualte duh ber ‘Remna thu’ chu in zaa chungah leng vek rawh se.
Krismas leh Kumthar chibai kan chhungkuain kan buk vek a che u.