Ngannou zin kawng bumboh

Ngannou zin kawng bumboh
Infiamna rorum leh hautak em em, lar chak tak ni bawk si chu Ultimate Fighting Championship (UFC) a ni a. UFC Palian huanga champion ding lai chu Cameroon fighter Francis Ngannou a ni. Ngannou zin kawng hi a bumboh hle a. Rethei taka nun hmang te, Truck driver nih leh jail tan te a inbilh tel vek.
UFC 260-ah palian huanga fighter ropui bera ngaih Stipe Miocic knockout a, palian champion kawnghren hrengtu Francis Ngannou hi Cameroon-a thingtlang khaw pakhat Batié khuaah a piang a. Khawsak a harsat em vangin he khuaah hian zirna in pawh a awm mumal meuh lo. An khawsak a harsat tawh sa nak laiin kum 16 mi lek a nih laiin a nu leh pa an inthen a, a nite belin zin kawng hautak tak a zawh a ngai. Lung lakna hmunah thawkin sum tlem a thawkchhuak ve thin a, a nite laka a inthlahrun lutuk loh nan a hrawk a chawm ve hram hram a ni ber.
A naupan lai ata Truck neih a, khalh a chak thei em em thin. Rawlthar tha za rual a nih lai atang hian an khua leh a chheh vela misual pawl (Gang) te chuan an pawl zawm turin an sawm fo hin a. Ani erawh chuan khawlaia insual a, pawisa tlem hlawhchhuah a thlang a, Gang sawmna a hnar. Amah a palian a, lunglaknaa thawk thang a lo ni bawk nen a hnek na em em a, boxing chu a ti thei ta fu. Kum 22 mi zet a nih tawh tihah boxing a zir tan a. Hliam a neih vang leh sum harsatna vangin a zir mek boxing chu a chawlhsan a ngai leh ren rawn thin. Kum 26 a lo tlin meuh chuan a rilru a siam fel a, French-ah kal a, inhnek hmachhawn tak tak turin an ram chhuahsan a thlang ta.
Europe ram pan chuan neih thinglung khawngin a phek chhuak ta. Europe-ah a ruka luh tum tia puhin Spain-ah man a ni a, thla hnih chhung ngawt tanin ah khung a ni. Jail rum thim a belh hnu hian eng tin tin emaw a tum ram khawpui ropui Paris chu a thleng ve ta hlawl. Paris a thlen tirh hian pawisa a nei lova, thian a nei lova, chenna tur in a nei hek lo. Chenna tur in nei lo ta fam chu khawlaiah a riak chawt thin. Hun thim leh hreawm tak a hman lai chuan a tan ni a lo chhuak ve tan ta.
Mix Martial Art (MMA) a inhnamhnawih thuk tak Fernand Lopez hnenah bah nuaihin a inhmelhriattir a, boxing a tuipuizia leh Mike Tyson tan em emtu a nih thute chu a sawi ve nuap nuap. Lopez chuan a han belchiang ta a, boxing ni lovin MMA chu a kalna tur nia ngaiin, a kawng zawh thlaktir a ni ta. Mumal takin MMA chu training ta a, a pa lian a, a kut thlak a na bawk si a, a til thlenna lam tak a lo ni reng chu niin, hma a sawn chak ta viau.
Ram hla tak atangin boxing zin kawng a zawh a. A tum ram a thlen hnuin a zing kawng a thlak a, MMA a lu chilh ta thut mai chu tihsual mai pawh a hlauthawng ru ve hle. “Engkim mamawh siin neih engmah neih ka nei si lo. Engtikah nge fight ka hmachhawn ang a, engtikah nge sum ka hlawhchhuah ve ang. Sum hlawhchhuah chu ka duh, ka duh tak zet a ni” tiin a phun mawlh mawlh fo thin a. ‘Suangtuah ram a liam a, a tak a thleng dawn ta’ tite in amah a infuih roh thin bawk.
Tichuan, kum 2013 atang khan MMA a khel tan a, fight vawi ruk hmachhawn in, vawinga a chak a, tumkhat chu tlawm zawkah a tang. MMA chhuahsan in, UFC a luhchilh ve ta thung.
Kum 2015 khan UFC-ah a vawikhat nan a inlan tan. Amah ang thoa UFC mi thar Luis Henrique a hmachhawn a, scond round-ah a khingpui hi a knockout. April ni 10, 2016 khan UFC mi thar Curtis Blaydes a hmachhawn leh a, scond round-ah hnehna a chang hman leh der bawk. Hemi tuma a hneh Blaydes hi palian huanga fighter tha pawl tak a rawn ni chho zui ta hial bawk. Knockout leh submision hmangin a chak chho ta zat zat a, fighter lar Junior dos Santo nen an inhmachhawn dawn ta. Dos Santo hmachhawn tura phur taka a inbuatsaih laiin a khingpui hi a inlan thei ta lo. Hemi hnu hian fighter tha, palian champion hlui Alistair Overeem nen an inhmachhawn ta thung. Palian pian nalh zet mai Alistair Overeem hi chiang zet maiin a knockout leh ta mai a, UFC ngainatute tan fighter tha a nihzia hai theih rual a ni ta lo.
Awlsam taka a khingpuite a hneh chhoh tak zel vangin kum 2018, January thlaa neih UFC UFC 220-ah palian champion Stipe Mioci hmachhawn in, kawnghren a chuh ta hial. Miocic a hmachhawn tum hian beisei a phak lova, unanimous decision hmangin tlawm zawkah a tang. World champion nih a tumna a puitlin zawh loh hnuin Derrick Lewis lakah a tlawm zui leh a, a boruak a hniam hman duai. Kawng dik zawh leh turin fighter hmasawn tak Curtis Blaydes chu awlsam zetin a hneh a, chak chho leh zat zatin Miocic kawnghren a chuhpui leh ta hial a ni.
March ni 27, 2021 a neih UFC 260-ah ropui takin a inlan a, an intawn hmsak tuma hneh loh Stipe Miocic chu round hnihnaah a knockout a, World champion a lo ni ta. Paris khawpuiah pawisa, thian leh chenna in nei lo tei rawlai thin, lung lakna hmunah hah taka thawk tawh thin Francis Ngannou kha khawvel champion niin, sum tam tak a lo hlawhchhuak ta. World Champion ni tura a thawhrimna te, a zinkawng zawh bumboh tak hre tan Francis Ngannou hi tan loh theih a ni lo va, a hlawhtlina chan hi lawmpui loh theih loh a ni tel bawk.
Kawng bumboh taka zawha UFC ah hlawhtlinna chang a, hming a chher hnu pawhin Ngaunou tan thil a la awlsam thei ts chuang lo fo. UFC neitu Danna Whiten an inhmuhthiam loh vangin UFC atanga nawrchhuah a ni deuh ber mai. Nuam a tih em em, hlawhtlinna changa hming a chherna UFC chu mittui nen a kalsan a, duhawm lo takin a tawp a khar a tih theih.
UFC a chawlhsan hnuin boxing te a han khel chho lawp lawp a. Tyson Fury lakah mit la takin inlan bawk mah se Anthony Joshua lakah a mualpho zui leh ta tlat thung. Zin kawng bumboh tak zawha bul tan kha kawng bumboh tak bawkin a tawp a khar. A tawp a khat that hlauh chuan chung lamah khiang kawng mam zawk a la zawh ve mahna le!