Ngenna tih hlawhtlin sak loh avangin college kal tur dang

Govt. Champhai College-a zirtirtu indaih lohna phuhruk sak tura an ngenna in awmzia a neih theih loh avangin MZP Champhai chuan Zirtawpni atang khan tiamchin awm loin zirlaite leh thawktute college kal tur an dang a, karleh hian na zawka nawr an tum.
MZP Hqrs. Champhai sawi danin, Govt. Champhai College-ah hian department thenkhatah zirtirtu dah belh mah se, thenkhatah indaih lo takin an awm a. An in affiliate-na Mizoram University ordinance-ah department pakhatah zirtirtu 4 tal awm tura tih a nih laiin Political Science leh Economics department-ah zirtirtu pathum chauh an awm tih an sawi.
New Education Policy system hman a nih hnuah phei chuan zirtirtu indaih lohna hi a nasa zual hle nia sawiin, Govt. Champhai College-in NAAC accrediation an hmachhawn turah zirtirtu indaih lohna department avang hian grade tha hmuh theihna kawngah nasa takin a tlahniam thei tih an sawi a ni.
Zirtirtu indaihlohna hi hun rei tawh tak atang khan an buaipui tawh a; sawrkar kaltaah pawh khan vawi engemawzat thlenin, sawrkar tharah beiseina sang tak nen a changtu minister hnenah lehkha thehlutin an bawhzui a, July 18 khan minister hnenah hian thlen lehin, July thla chhunga zirtirtu indaih lohna hnawhkhah sak turin an ngen a; an ngenna hi tihhlawhtlin a nih loh avang leh sawrkar atangin eng thu mah an dawn loh avangin an thil phut tih hlawhtlinna atan zirlai leh zirtirtu class kal tur hi an dang ta tih an sawi a ni.
Sawrkar thuchhuak ngaihchan a nih hnuah thu lawmawm an la hmuh loh avangin August 5 atang hian Champhaia zirna in zawng zawng leh sawrkar pisa kai tur dan an tum tih an sawi a. Hei hian bank leh hospital OPD erawh a huam lo tih an sawi a ni.