NGO leh Home secretary inkawm FMR leh ramri hungah tanna ngai AAI kutah airport hlan thuai tum

Sawrkar laipui Union Home ministry ruahman angin Mizorama NGO hrang hrang – CYMA, MHIP, MZP leh MSU bakah ZoRO aiawhte leh Union Home secretary Govind Mohan chu Thawhlehni tlai khan New Delhi-ah an inkawm a. Free Movement Regime leh ramri hung chungchang an sawi.
Union Home secretary chuan Myanmar nena inrina hung tura India sawrkar hmalaknaah Mizoram civil society (NGO) te thlawpna an beisei tih a sawi a. Dodal lo hram turin a ngen. NGO hruaitute chuan FMR leh ramri hung chungchangah NGO Coordination Committee anga ngaihdan awmsa an neih an sawi a, a tul anga a ram mipui ngaihdan leh duhdan ngaipawimawh thiam turin an ngen ve thung.
FMR leh ramri hung chungchangah hian inhmin thei loin an inthen rih a. NGO hruaitute hian an member/ mipui ngaihdan la loin thu pawtchat thei an ni lo tih an hrilh tih thu dawn a ni.
Tunhnaia Aizawla Union Home minister a kal tuma a sawi, Airport Authority of India (AAI) kuta Lengpui Airport hlan chungchang hmalak tawh dan chu NGO hruaitute hian an zawt a. Mizorama ruihhlo hluar lutuk, Mizorama foreigner luh phalna PAP (Protected Area Permit) leh pawl hrang hrang hmachhawp an sawi nawn bawk.
Union Home secretary hian Mizo mipui duh dan anga AAI kuta Lengpui Airport hlan tura an lo sawi tawh angin hma an la mek a. Mizoram chief secretary chu proposal siam a, a rang lama thehlut tura an hriattir tawh a, an intiam anga thla thum chhunga hma an lak hman tur thu a lo hrilh.
Mizorama ruihhlo hluar a vei thu leh, Mizo mipuiin nasa taka an do chu lawmawm a tih thu Govind Mohan hian sawiin, hemi kawnga hmalatute chu Narcotics Control Bureau kaltlangin sum leh hmanrua a tul apiangah an pui dawn tih a lo sawi a ni.
Tunhnaia foreign atanga Mizorama lo zin tumten harsatna an tawk nasa, tiin, Mizoram luh phalna dan mumal lo chungchangah hmala turin Union Home secretary hi ngen a ni a. Mizoram luh phalna – PAP awlsam zawka lak a nih theihnan ruahmanna a lo siam tur thu sawiin, a enzui turin Intelligence Bureau joint secretary (NE) a ruat nghal.
Mizo thalaite sipaiah a tam thei ang ber an luh theihnan ruahmanna siam tura ngenna chu, central armed police force-ah Mizo thalai a tam thei ang ber an luh theihnan batallion thar din tumin hma lak a ni a, thla thum hnuah lak tan theih an inbeisei tih a sawi.
Mizoram tana hmasawnna tur hrang hrang – convention center sak, scholarship, coaching center leh school tih changtlunna dan tur an sawiho bawk.
Union Home secretary hi Intelligence Bureau director, Border Management secretary, NE advisor, BSF DG, Narcotics Control Bureau DG, Assam Rifles DG bakah chan hrang hrang nei joint/ addl secretary rualin an tawiawm.