NGOCC-in IAF kuta Lengpui Airport hlan lo turin CM ngen

NGOCC-in IAF kuta Lengpui
Airport hlan lo turin CM ngen
NGO Coordination Committee (NGOCC) Mizoram chuan Zirtawpni khan chief minister Lalduhoma a hmu a. Mizoram-in airport a neihchhun Indian Air Force (IAF) kuta Mizoram sawrkarin hlan a tum chu ngaihtuah nawn turin a ngen.
Airport enkawl a hautak avang leh sum lama harsatna sutkianna tura sawrkar hmalaknaah hian IAF kutah hlan mai loin, kawng dang dap leh hram turin an ngen NGOCC hian sawiin, 2024 August 9 khan “Lengpui Airport hi IAF kuta hlan kan remti lo” tiin thuchhuah a lo siam tawh a. NGOCC thutkhawmin a rel angin, tun tumah hian chief minister hnenah ziakin “Lengpui Airport IAF kutah hlan lo tura ngenna” lehkha a thehlut leh a. Sawiho nghal a ni.
Chief minister chuan NGOCC hruaitute hnenah airport enkawl a hautak thu lo hrilhin, “Ram dang anga airport changtlung leh tha kan duh a nih chuan midang enkawl duh kan zawn a ngai a. Keini chauh hi midang kuta hlan tum kan ni lo. Sawrkar kal tawh zawng zawng pawhin airport enkawl hautak zia an hria a. AAI leh IAF kuta hlan tumin an lo dawr tawh a ni,” a ti.
16 Finance Commission-ah airport tih changtlunna tur leh runway thar siamna tur an dil dawn a. phalsak an nih a, centre-in sum mamawh a pe thei a nih chuan Mizoram sawrkarin enkawl zui a inhuam reng tih sawiin, NGO hrang hrangte pawhin 16 Finance Commission-ah theih ang anga Mizoram sawrkar hmalak tum dan hio dawra lo sawipui turin a ngen tih a lo hrilh a ni.
Chief minister chuan Lengpui Airport hi India ramah state-in a enkawl awmchhun nia sawiin, khawi state mahin airport an enkawl zo loa, Airport Authority of India (AAI) meuh pawhin an airport enkawl hi private company hnenah a hlan mek zel tih a sawi. “Keini ang state rethei-in airport zo leh zo loa kan enkawl hi a hautak hle a; airport changtlung tak Mizoram-in kan neih hi sawrkarin kan duh ber a ni,” a ti.
NGOCC-ah hian, Central YMA, Mizoram Upa Pawl, Mizo Hmeichhe Insuihkhawm Pawl, Mizo Zirlai Pawl leh Mizo Students’ Union an tel a ni.