Ngunhnam vai thiam Ukraine nulate

Indonain a kiansan theih rih loh ram Ukraine chuan Inrinni khan Paris Olympic Games 2024 kal laia an gold medal hmasaber an hlawhchhuak a, women’s sabre team event final-ah South Korea hnehin an champion.
Ukraine hian Rio 2016-ah khan women’s sabre team event-ah hian silver medal sualchhuakin, kum thum liamta Tokyo-ah khan medal an la pha lo thung a, tunah Paris 2024 kal laia an gold medal hmasaber atan an hmang ta a ni.
Karliamta Thawh\anni daih tawh khan Ukraine women’s sabre team-a an player pawimawh Olga Kharlan chuan individual bronze awrhin Paris-a Ukraine medal hmasaber a hlawhchhuak a, tunah team inelna hmangin an ram gold hmasaber a lakpui leh ta a ni.
Ukraine team hi 37-40-in an hnufual zet hman a, Kharlan hian 22 total touch score chungin South Korean nulate lakah 45-42 hnehna a chanpui ta a ni.
Kum 33-a upa Kharlan hian a pumpuiah Olympic medal paruk la tling tawhin, kum 2008-a Ukraine tana team event title a lo lak tawh nen Olympic gold pahnih a awrh tling tawh a ni.
An ram team hlawhtlinna lawmin Ukrainian president hlui Petro Poroshenko chuan X-ah lawmpuina a tarchhuak a, inelna chep leh harsa takah an team-in a tawp thlenga an beih hram hram rah an seng tih sawi chungin an ram infiammite inpekna a fak.
Japan chuan Games thlengtu France laka 45-40 hnehna nen bronze medal an dawng ve bawk.