NH-06 kawng tunhma ang mai maia enkawl a rem lo – PWD minister

National Highway 06 huamchhunga Khamrang to Kawnpui kawng siam chu tunhma ang mai maia enkawl a rem tawh lo tih PWD minister Vanlalhlana chuan a sawi.
Khamrang to Kawnpui kawng siam mek hi Zirtawpni khan PWD minister hian a hmunah a tlawh leh a. Kawng siam chu chak taka kalpui rualin, mipui harsatna thlen lo thei ang bera hna thawk turin thawktute a fuih a. He kawng hi Mizoram mamawh lakluhna hnukpui a nih avangin a chhe rei thiang loa, chak taka siam a tul tih a sawi.
Contract hna reng reng, kawng siam a ni emaw thil dangah pawh dawngdah taka hna thawk thinte sawrkarin a dim dawn lo tih Vanlalhlana hian a sawi a. Mizoram State Project Monitoring Committee mit tlung loa hna thawkte chu an phu tawka an chungthu ngaihtuah a ni zel dawn, tiin, Mizoram sawrkar chu kalphung thar sawrkar a nih tawh avangin NH-06 pawh tunhma ang mai maia dawngdaha enkawl a rem tawh lo tih a sawi a ni.
Tun dinhmunah NH-6 hi duhthusamin siam hleih theih loh mah se, lirthei engpawh kal theiin enkawl chhunzawm mek a ni tih minister hian a sawi a. “Kan châk lakna kawng ber a nih avangin englai pawha lirthei kaltlang theiha enkawl chhunzawm zel hi sawrkar chuan kan tum a ni,” a ti.
Kuminah Mizoramin fur a tawrh nasat thu leh ruahtui tlak chhung a rei thu sawiin, ‘Tunah hian Aizawl khawpui hmun hrang hrangah kawng chhe zual thawmthat mek a ni a, ruahtui tla tam ziaawm se, a aia tha lehzuala kawng thawmthat zel a ni dawn’, a ti.