NH 306&06 kawng thawmthat mek dan leh harsatna an sawiho

NH 306&06 kawng thawmthat
mek dan leh harsatna an sawiho
National Highway 306&06 thawmthat hna chak zawka a kal theih dan sawihoin Thawhlehni khan Kolasib bawrhsap Robert C Lalhmangaiha kaihruaia thutkhawm a ni a. May 24-a Home minister hoa Sairang leh Kawnpui inkar kawng enfiahna thuchhuak bawhzui dan sawi a ni.
NHIDCL hian kawng siam meka hnathawh dan leh harsatna an sawi a. Sum sanction awm lo chu an harsatna ber a ni, tiin, sum release hma in contractor thenkhat chu mipui mamawhna avanga inbiakpuiin hna an tan tir tih an sawi.
Tunlai khawchhiain kawng siam a tih hautak thu sawiin, ni hnih thum ruahsur loa a awm chuan an kawng siam chuan nasa takin hma a sawn dawn tih an sawi. Khamrang leh Kawnpui inkar PWD enkawl mek pawh NHIDCL kuta hlan fel a ni tep tawh a, hlan a nih rualin hna an thawk tan nghal dawn tih an sawi bawk.
Balaji Construction Company chuan thawmthat ngai lai an thawmtha zel dawn a, chutihrualin Mizoram leilung nghet lo lutuk avang leh a innghahna (base) tihngheh (strengthened) a nih loh chuan a tha rei thei tak tak dawn lo, tiin, chumi tihnghehna tur chu estimate-ah a tel si lo niin an sawi.
Thutkhawmah a kaihhnawih sawrkar aiawhte bakah Vairengte, Khamrang leh Kawnpui khawtlang hruaitute, Sub-Hqrs YMA, MJA Kolasib District, Kolasib District Truck Owners and Drivers Association aiawhte an tel.
Pawl hrang hrang aiawhte hian kawng dinhmunah an lungawilo tih sawiin, hun rei tak atanga an lo khel tawh, a ngai leh ngai ngawta a awm chu pawi an tih thu an sawi a. Kawng tha an neih theihnan sawrkar leh NHIDCL-in theihtawp an chhuah ngei an duh tih an sawi a ni.