NH 54& 302 kawng dinhmun sawiho
National Highway 54A & 302 (Hrangchalkawn – Tlabung) kawngpui leh NH 54 (Aizawl – Tuipang) kawngpui laih zauh leh siamthat hna thawh mek dinhmun leh lirthei tlan dan ruahmanna sawihoin Nilaini khan Lunglei district bawrhsap Navneet Mann hoin a kaihhnawih sawrkar hotute, kawng enkawltu NHIDCL leh hna thawktu contractor-te leh Lunglei Maxi Cab Owners Association aiawhte an thukhawm.
Thutkhawmah hian 3Gate – Sazaikawn huamchhunga kawng laih tharna hmuna lung leh lei tla mai thei hmun hrang hranga awm chu a rang thei ang bera enfiah a, chhiatna a thlen palh lohna tura hai fai turin contractor-te hriattir an ni. Leivung paih avanga harsatna thleng mek chu contractor-ten leivung dawlna tur an siam loh avang leh leivung paihna hmun tura an paih loh avang nia ngaih niin, khauh lehzuala enzui tum a ni. Leivung paihna tur hmun dik takah a dawlna tur tha taka siamna hmunah chauh leivung paih turin kawng laitute hriattir nawn an ni.
Tawipui North-II khaw bula lirthei chetsual fona hmun chu NHIDCL-in an enfiah tawh a, kawng siam danah fel lo a awm loh tih an sawi. Hei hi bawrhsap pisa, PWD, MVI, NHIDCL leh NGO-te nen a hmalamin a hmunah enfiahin, a tul anga hma lak nise, tih a ni.
NH-54 (Aizawl – Tuipang) leh NH-302 (Lunglei – Tlabung) kawng laih mek dinhmun sawi a ni a. Kawng laituten harsatna an tawhte an sawi bakah ram neitute atanga harsatna awm thlirho a ni. Kawng laitute chu fur atan harsatna leh chhiatna a thlen lohnan tha taka inbuatsaih tura hriattir an ni.
Kawng siamtute chuan hna an thawh dan leh hmachhawp an sawi a. Lungsen leh Tlabung inkar kawng laih hna zaa 90 leh Sazaikawn leh Lungsen inkar kawng laih hna zaa 70 thawh zawh a ni tawh.
NH 54& 302 kawng dinhmun sawiho
Get real time updates directly on you device, subscribe now.