NH-6 kawng siam mek ZPM Thalai-in kartin tlawh an tum

ZPM Thalai Hqrs president Jeje Lalpekhua, MLA chuan National Highway-6, Sairang leh Buichali inkar kawng thawmthat hna thawh mek chu Inrinni khan a tlawh.
Ministry of Road Transport & Highways hnuaia awm NH-6 enkawltu NHIDCL leh an hnuaia thawk contractor pathum zingah Sairang to Buichali kawng khawihtu J.Infratech Pvt Ltd (JANDU) nen an hmalakna an enho a, he kawng hi kumin January 22 khan ZPM Thalai hian a hmunah a lo enpui tawh a, an vil zuizel reng tih an sawi a ni. Sairang to Buichali hi kawng siamtuten hna tan tawhin Hot Mix Plant an bun pawh a function tawh a, cement concrete chhun tur metre 820 leh resufacing & bitumen concrete km.11 hna hi kumin April-ah zawh an inbeisei tih thawktute hian an sawi.
ZPM Thalai president chuan kawng siam mek hi an vil reng dawn, tiin, fur ruahtui tlak hmaa siam zawh ngei a nih theihnan chak tak thawk turin contractor hi a hrilh. Mizoram mipui tana kawng pawimawh tak an khawih avangin tha taka mipui duhthusam ang ngeia siam turin a hrilh a, company hotute hnenah hian ‘hna chhia leh rintlak loh a awm chuan ZPM Thalai an ngawi mai mai dawn loa, Headquarters atangin kawng siam viltu tur inruatin kartin an tlawh dawn tih a hrilh a ni.
ZPM Thalai Hqrs. thuchhuak chuan, NH-6 kawng hi ZPM sawrkar chuan a ngaipawimawh hle a, thawmthat hna thawh mek chu chak leh tha taka thawh a nih theihnan a vil reng a, khawpui chhunga kawng siam pawh an tlawh tawh a, hnathawktute theihtawp chhuah tura fuihin a nawr reng tih a sawi a ni.