NH siam thar tur NHIDCL hnenah MLA-in a thlen

Lengteng bialtu MLA Dr L Thangmawia chuan Nilaini khan NHIDCL Hqrs office New Delhi tlawhin Mizoram lam bialtu general manager (Technical) M Khalid chuan a lo dawngsawng a, MLA hian a bial kaihhnawiha NHIDCL hmalakna sawipuiin a zawtfiah bawk.
November 2021-a chief minister Pu Zoramthanga’n Hliappui atanga Kawlkulh, Puilo adt. kaltlanga Serchhip bula Lunglei kawng pawh tura national highway thar sawrkar laipuia rawtna a thlen tawh chu kawng pawimawh tak tur a nih thu Dr Thangmawia hian hrilhin, sawrkar policy anga KMMTTP kawng leh Myanmar-a Sittwe lawng chawlhna hman tangkai a nih theih hunah chuan Mizoram hmarchhak mai bakah Manipur state tana highway pawimawh ber tur a nih thu a hrilh. Tuna highway awmsa aia km.60 chuanga a tawi zawk dan tur map atangin an en ho a, a rang thei ang bera tihlawhtling turin a ngen. NHIDCL general manager chuan theihtawp chhuaha a bawhzui tur thu a lo hrilh.
MLA hian a bial chhung Mimbung bul, Tuivai lui atanga Defence Road siam thar tur zawtfiah nghalin Tuivai kama tawp tawp loa, Tuivai lei dawh nghal turin a ngen a. NHIDCL hotute chuan he Defence Road hi Lengteng bial Tuivai atanga intanin, Myanmar ramri hrut phei zelin Zorinpuiah a tawp dawn tih lo hrilhin, a project hmingah Indo-Myanmar Border Road (IMBR) an vuah thu leh km.780 a thui tur a nih thu te, 2024 March ah detail project report (DPR) an peih hman tur thu MLA hi an lo hrilh a. Tuivai lei dawh pawh DPR-ah an lo telh tur thu an hrilh bawk.
NHIDCL hotute chuan tun atanga kum hnih chhungin Mizoramah inkalpawhna kawng tha tak siam zawh hman ngei an tum thu an lo sawi a ni.