NHIDCL enkawl tur kawng state sawrkarin kan enkawl lailawk sak – PWD minister

National Highway-6 Kawnpui atanga Khamrang kawng thawmthat mek chu Ningani khan PWD minister Vanlalhlana’n a endik a. NHIDCL enkawl tur kawng, an la lak duh loh avanga loh theih loha sum dapchawp chunga state sawrkarin a enkawl lailawk a ni tih hriatpui turin mipui a ngen.
Mizoram ei leh bar lakluhna kawngpui Vairengte atanga sairang inkar NH-6 hi NHIDCL kuta awm niin engemaw hna laklawh avangin Mizoram sawrkar chuan mipui mamawhna hriain a enkawl lailawk tih PWD minister hian a sawi a. Mizoram sawrkarin a enkawl hnu hian a thawhkhatna atan he kawngpui hi nikum lam khan cheng nuai 75 sengin thawmthat a lo ni tawh a, nikum vek December 25-a NHIDCL kuta awm leh tura ruahman a nih laiin, NHIDCL hian an lak tak si loh avangin state sawrkar chuan sum remchang ang ang pawtkhawmin, vawiin thlengin mipui mamawhna hriain a enkawl chhunzawm leh rih ta tih a sawi a ni.
“National Highway-6 thawmthat hna hi kumin January 20 atang khan a tum hnihna atan thawh tan a ni a, tun tumah hian cheng nuai 125 ruahman niin, February 15-a siam zawh tum a ni a, sum ruahman sa hian a daih hmel loh avangin sawrkarah dilbelh leh mek a ni a, ngawrh taka siam a ni,” Vanlalhlana hian a ti.
Mipui harsatna sawrkarin a hria a, chumi chhawk zangkhai tur chuan Mizoram PWD kawng enkawl ni miah loah mawhphurhna an la a, mipui leh lirthei neitute pawhin sawrkar thahnemngaihna hriathiam pui thin se an duh hle tih minister hian sawiin, “Nitina kan mamawh kan phurhluhna kawng hi mipuiin kan dim thiam a tul a, a tichhetu niloa, dimdawi taka enkawltu kan nih theuh ka beisei a ni,” a ti.