NHM hnuaia thawkten an tan hna nghet zuahsak ve an phut

Sawrkar gazette awmsa tlawhchhanin, National Health Mission hnuaia thawktute chuan sawrkar hna nghet zuah sak ve turin thuneitute an phut a. An beisei anga tih a nih loh chuan lungawilohna lantir an tum tih an sawi.
NHM Employees Union Mizoram (NEUM) thuchhuak chuan, Mizoram sawrkarin kumin June 18 khan centrally sponsored scheme-a thawkte tan regularization/regular appointment hauhsak tur gazette notification a tichhuak tawh a. Hetihlai hian Health & Family Welfare department hnuaia regular post lak tur thenkhat – health worker, staff nurse, laboratory technician, x-ray technician adt. ruahmanna siamah NHM (National Health Mission) hnuaia staff-te tana hamthatna awm thei lo zawngin a thar vek lak tura department atanga rawtna a kal chu tha lo an ti hle tih a sawi.
Health & Family Welfare department hnuaia regular post lak tur awm reng rengah ‘The Government of Mizoram Regularization of Centrally Sponsored Scheme (CSS) Employees Scheme 2024’ a taka hman a nih theih nan, department hotuten ngaihtuah saka hma lakpui turin an phut tih sawiin, ‘Health worker lakna tura proposal kal lai bikah chuan department-in a post 150 lak tura a rawtna DP&AR-in post 51-a a tihniam hi tha lo kan ti a, a tira proposal anga kalpui kan phut a; post dang lakna tur (staff nurse, x-ray technician, pharmacist adt) a thara lak tura ruahmanna awm mekah hian NHM employee-te tana zaa 70 tal dah turin kan phut a ni,’ a ti.
Health Secretariat lehkha, kumin July 297hmanga Health Directorate-a CSS (NHM) regularisation chungchanga information dilna vawiin thlenga chhan a ni lo chu chhanna pe thuai turin an phut tih a sawi bawk.
‘Gazette notification ang hian, Health & Family Welfare department-a vacant post awm zawng zawng 70% tal, NHM hnuaia kum 10 thawk tawhte tan, anmahni corresponding post theuhah regularise nise kan ti a. NHM hnuaia contractual-a kum 10 chuang thawk mek, Health & FW department-a corresponding post neilo zawng zawng tan special post (temporary post) siamsak a, regularise kan phut a ni,’ NEUM hian a ti.
Sawrkar hmalakna an ngaichang anga, hmalakna mumal a awm loh chuan kumin September 26-28 chhung hian badge dum bela lungawilohna lan tir nise, an ti a. Hma an sawn lo a nih chuan an kal zel dan tur an la ngaihtuah dawn tih an sawi a ni.