Ni 100 inhlawhna hlawh centre-in la pechhuak lo

Ni 100 inhlawhna – MGNREGA-a job card neitute hlawh tur chu sawrkar laipuiin a la pechhuak thei loa, state department mawh ni lo mah se, theihtawpin centre an nawr ve mek tih sawrkar chuan a sawi.
Mizoram Rural Development department chuan, MGNREG Act leh operational guideline angin MGNREGS hnuaia mipui inhlawhna (wage) hi Mizoramah pawh thlatin tluang taka kalpui thin a nih laiin, tunhnaiah inhlawhna sum hi sawrkar laipuiin a la pekchhuah loh avangin job card neitute account-a la lut lo a awm nual tih hriat a ni tih a sawi.
MGNREGS hnuaia thingtlang mipui inhlawhna (wage payment) chu sawrkar laipui duhdan leh ruahman angin online leh electronic payment vekin NeFMS hmanga kalpui a ni a. Mipui inhlawhna mil zelin software – NREGASoft hmangin fund transfer order (FTO) MIS (Management of Information Systems) siam zel a ni a. FTO hmang hian sawrkar laipui chuan job card neitute bank account-ah direct-in inhlawhna sum a thun thin tih a sawi a ni.
MGNREGS hnuaia inhlawhna bik hi centre atanga 100% direct funding niin, hlawh tur hi Mizoram Finance department kaltlang loin, job card neitute account-ah direct benefit transfer (DBT) hmanga rawn thun (credit) thin a ni tih sawiin, ‘Mipui inhlawhna ang zelin Mizoram RD department chuan FTO hi MIS-ah district leh block tina thawktute kaltlangin a siam (generate) sak nghal zel a. Tun dinhmunah Mizoram sawrkarin tihkhawtlai (pending) engmah a nei lo. Inruahman lawk ngai hrang hrang – FTO siam leh UC thehluh pawh 2023 Krismas hma khan a ti vek tawh a. Centre-ah a rang lama mipui inhlawhna pechhuak thuai tura dil mek a ni a. Centre pawhin a tahtawlin mipui inhlawhna leiba hi a rawn tihfel thuai beisei a ni,’ a ti.
Tun dinhmunah Mizorama MGNREGS hnuaiah active workers 218581 an awm a. Job card neitute tan December 2023 thleng khan nitin mi pakhat tan anga chhutin inhlawhna vawi 15251426 siamsak an ni tawh. Kum kal meka job card neitu, chhungtinte inhlawhna pek tawh dan chu chawhrualin zaa 69.96 a ni.