Ni 100 inhlawhnaah ‘kalphung thar’ awm

Ni 100 inhlawhna tia hriat, MGNREGS-ah sawrkar laipui chuan ‘kalphung thar’ a duang a, dan dik thlapa kal a nih theihnan ruahmanna a siam a, he scheme hmang tangkai thintute chu tha taka zawm turin a vaukhan lawk bawk.

Rural Development & Administration minister Prof Lalnilawma sawi danin, kumin July 8 khan Ministry of RD chuan state sawrkar tin hnenah ni 100 inhlawhna scheme-ah hian uluk takin state hrang hrang vil an ni dawn a, National Mobile Monitoring System (NMMS) app hmanga hnathawk attendance lak leh an thawh zawha attendance lak a ngai tawh dawn a, hnathawh tantirha thawktu zat leh a thawka te ngei theuh an inlan vek loh chuan khami ‘group’ a thawktu dang zawng nen thawh man pek theih loha hnawl a ni dawn tih a hriattir.
“Zing lam attendance-a mi 20 thlalak kha, tlai ban dawna mi 20 an tlin leh loh emaw midang hmel daih emaw a lo lan khan, khami nia inhlawhna kha reject theih a ni. Reject a nih chuan thawk lo angin kan lang dawn a, hlawh kan nei thei dawn lo. Khawi state mah ngaihnathiam kan ni loa, dik lo taka thawk leh attendance la thinte lakah Zero Tolerance Policy an apply dawn a, hrereng chunga tisualtu chungah na taka action la turin state zawng zawng min rawn ti a ni,” a ti.
Mipuiin chanvo (entitlement) kan neih rualin, mawhphurhna leh tih tur (responsibility) kan nei tel tih hriat let a pawimawh hle tih RD&A minister hian a sawi a. Ni 100 inhlawhna scheme-a mipui inhlawh duh chuan nikhatah darkar 8 tal hna an thawh a ngai a. Chumi tlin loh chuan nikhata tuna wage rate hman Rs.281 an hlawh kim thei lo tih a sawi.
Hnathawh tur chungchangah pawh sawrkar laipui a khauh thar dawn tih a sawi a. Mimal ram tha lai leh thlai chinna atana hman lai ram (cultivable land) ni lo, mimal ram chhia leh ram bua cultivable land-a siam tura thawh sak bakah mipui vantlang chhawr tangkai theih - community land development lam thlurbing a ngai dawn tih a sawi. Zawhna a chhannaah, feh kawng sialna ang erawh la tel thei turah an ngai tih Prof Lalnilawma hian a sawi a ni.
VC/VEC ten mahni khuaa job card dil thar chu Aaadhar card leh bank account an neih chuan rang taka BDO/ programme officer hnena dilpui thuai turin a chah a. Heng thil pahnih hi an neih loh chuan neih tir dan ngaihtuah pui thuai a ngai tih a sawi.

RD&A hotute sawi danin:
8	Tunah Mizoramah job card 212517 a awm a, MGNREGA chhawrtu chhungkua 212517 an awm tihna. Job card nei chhungkua 212517 atangin hnathawk thin (worker) 233536 awmin, hmeichhe hnathawk thin (workers) 120276 an awm.
8	2024- 2025 sawrkar kum chhung khan Ministry of RD atangin wage component atan cheng nuai 59158.0797 hmuh a ni a, material component atan nuai 913.61 hmu in, ni 100 an inhlawh tling.
8	Sawrkar kum kal mekah wage component atan ministry atangin cheng nuai 35326.15863 sanction hmuh a ni tawh a. Material component atan nuai 2207.00 hmu tawhin, ni 28 inhlawhna siam a ni tawh.
8	2024- 2025 chhung khan mumal takin MGNREGA hnuaiah department leh scheme hrang hrang 13 nen ‘convergence’ neih a ni a. MGNREGA atangin cheng nuai 482.58 leh department /scheme atangin nuai 260.04 hman niin, a vaiin nuai 742.62 convergence hnuaiah thingtlang mipui tan ‘assets’ siam a ni.
8	Sawrkar kum kal mek 2025- 2026 ah department leh scheme hrang hrang 17 nen convergence hmanga thawh ho tum a nih bakah MGNREGA - Project Rotling - Hmasawnna Rahbi Thar atangin thingtlang mipui hmasawnna tur project 15 kalpui mek a ni bawk.