Ni 125 inhlawhna sawifiah
Ni 125 inhlawhna sawifiah
India sorkarin ni 125 inhlawhna a duang thar a, Mizoram BJP hruaitute chuan, “Ni 125 inhlawhna, hnathawh theihna tura duan a ni ta hi a lawmawm em em a, mi rethei tam tak te’n he Scheme kaltlanga inhlawhna tha tak kan hmuh theih dawn avangin a lawmawm hle a ni,” an ti.
Thawhlehni khan Mizoram BJP hruaitute’n ni 125 inhlawhna chungchang hi thuthar lakhawmtute kawmin an sawifiah a, ni 100 inhlawhna (MGNREGA) tichangtlungin India sorkarin ni 12 inhlawhna VB-G-RAM-G a duang tih sawiin, MGNREGA kha nikum December ni 15 khan VB-G-RAM-G hmanga thlak a nih thu an sawi.
Scheme zawng zawng hi central-in a ruahman vek dawn tih dawt thuthang a awm niin an sawi a, Gram Panchayat leh Gram Sabha te’n an khua leh tui hmasawnna tur chu anmahni ngeiin an ruahman ang a, khaw chhungah hna eng ang nge thawh tur tih pawh anmahni’n an rel thei dawn a, ruahmanna siam chungchangah a mawhphurhtu lian tak chu Village Council an ni dawn tiin an sawi.
VB-G-RAM-G Scheme hnuaiah hian, hna thawh tur zatve (50%) aia tam chu Gram Panchayat (VC/VEC) kaltlangin direct-in thawh theih a ni dawn tiin an sawi a, hei hian khawchhung mite tan hna a siam thei ang a, a takin thingtlang khua te’n hmasawnna an hmu thei dawn nia sawiin, Gram Sabha leh Gram Panchayat te’n a an khua/veng tana hmasawnna tur ruahmanna an siam tur ah ngaihpawimawh tak tak pali an thlang a, tui dahkhawlna (water conservation), hmasawnna hna thawhna tur siamte, (infrastructure creation), eizawnna tihchakna (livelihood-oriented works) leh chhiatrupna lo thlen thulha ruahmanna (disaster management) lo siam te a nih thu an sawi.
He Scheme thar hian hlothlawh leh buh seng hun laia loneitute tan remchanna a siam tha em em a, kum khatah ni 125 hna an thawh theih ngeina turin ‘guarantee’ a la awm reng a, thingtlang lam lonei mite tan kum khatah state sorkarin ni 60 thleng hna chawlhtir theihna thuneihna an nei bawk tih an sawi bawk.
“Congress leh pawl dang (opposition) te hian he Scheme thar siamchhuah tak hi mipuite hnenah thudik lo hmangin, an rinthuin mipuiah zirtirna dik lo an lo nei a, he Scheme thar leh Hindu sakhua hian inzawmna an nei lo a, a hming awmzia pawh hi opposition tan chuan zir tham a ni ngei ang,” an ti.