Ni 19 hnuah ruah sur ta lo

Tun hnaiah ni 19 chhung ni tin ruah a sur a, a ni 20-naah chuan a sur ta lo.
Ruah hi May ni 17 atanga June ni 4 thlengin Mizoramah ni tin a sur a, June ni 5-ah khua a ro ta.
Ruah hi chhum lo chat lova sur a ni lo a, mahse ni 19 chhung hian a sur miah loh ni a awm lo. A tam ni-ah phei chuan a tam thei hle.
A tir lamah khan a tam lem lo a, May ni 30 atang khan a tam. June ni 1 thlengin ruah hi a tam a, a zawnin ni thum chhung chu ruah tui mm 100 chuang a tla.
Ruah tui mm 100 chin hi chu ruahpui a tling a, mm 30 chin pawh tam tham tak a ni. State Meteorological Centre chhinchhiahnaa a lan danin, May ni 30-ah mm 101.8 a tla a, May ni 31-ah mm 139.8, June ni 1-ah mm 155.2 a tla.
May thla hi |omir thla, to haw hun, ruah tam thla a ni a, 2023 May-ah khan thla tluana ruah tui tla zat chu mm 102.8 a ni. Chuta tang chuan kumin May ni 30, May ni 31 leh June ni 1 tea ruah tui tla zat hi a tam a ni tih chu a chiang mai ang.
May leh June hi ruah sur hun a ni a, India ramah May atanga September vel thleng hian ruah sur hun monsoon tiin an sawi thin. Tunah pawh ruah hi sur leh tura ngaih a ni a, June ni 5-ah sur lo mah se kar leh Nilaini thleng hian India Meteorological Department lam chuan Mizoramah ruah a sur ang tiin an thlir; mahse tam thama sur turah an ngai lo.
Tun hnai ruah surah hian Mizoram hmun hrang hrangah vanduaina a thleng a, sikul pawh ni li chhung khar niin, May ni 29 leh ni 30, June ni 2 leh ni 3-ahte khan sorkarin sikul chawlh a puang a ni.