Nigerian tlangval, kum 24 mi, Oside Oluwole aka Khoded chuan darkar 75 chhung chawl lovin videogame a khel a, a game khelh hi football niin, soccer videogame khel rei ber record a siam. A hmaa hetiang record chu sap tlangval David Witefoot-a’n 2022-a a siam niin, ani hian darkar 50 chhung a khel ve tung.
Oside hi qualified biochemist niin, car dealer a thawk lai a ni a, a record siam hi an khua, Ijebu Ode a damdawi in puala sumtuak nana a tih a ni.
Videogame-a football khel rei lo siamtu hmasa mi pasarih te chuan FIFA emaw Pro Evolution Soccer emaw khelin record an siam thin a, Oside hi chuan mobile game Dream League Soccer 2023 a khel ve thung a, a iPhone leh TV screen thlunzawmin game hi a khel a ni.
Guinness kaihhruainaah chuan darkar khat a khelh apiangin chawlh minute 5 zel a nei thei a, a chawlh neih hi a khawl khawm thei bawk. He chawlh a neih chhung chauh hi ei leh in, intihfai leh han mutthluk sek nan te a hmang thei. Oside chuan, “Darkar tlemte chauh chawl a darkar 75 chhung ka khel thei hi keipawhin nuam ka ti khawp mai. Thil awlsam tak chu a ni, mahse, a nuam ve hranpa tlat. Hun tawn ropui leh danglam tak a ni a, ka puitlin thei hi Pathian chungah ka lawm hle a ni,” a ti.
Videogame-a football khel rei record hi an siam hmasak ber cu 2010 kha niin, chumi tuma record chu darkar 24 a ni, chumi hnuah record dang 11 a awm leh tawh a, a hnuhnung ber chu darkar 50 niin, Oside hian darkar 75 khelin record thar a rawn siam ta a, hetiang khawpa record dinglai khum nasa hi hetiang record-ah hian a la awm ngai lo.
Ni 3 chhung videogame khelin record siam
Get real time updates directly on you device, subscribe now.