Ni 36 chhung ASF vangin vawk thi lo tawh

Tunlaiin ASF thawm a reh a, ASF vanga vawk thi a awm rih lo. Ningani thleng khan tun hnai ni 36 chhung chu ASF vanga vawk thi a awm lo tawh.
African Swine Fever (ASF) hi 2021 hnuah Mizoram a tibuai a, he hri vang hian kum tinin vawk engemaw zat a thih bakah suat pawh a tam. Tun hnaiah erawh a zia a, hrileng a zia rih.
AH&Vety department atanga thu dawn danin, nikum December ni 10 khan vawk thi a awm a, chumi hnuah chuan he hri vanga vawk thi a awm rih lo. Nikum December ni 11 atanga kumin January ni 15 thlengin vawk a thi rih lo.
AH&Vety department hotute chuan tun hnaiah ASF vangin vawk thi lo mah se he hri hi a reh tawh tihna a ni chuang lo an ti a, he hri hi Mizoramah a awm nghet tawh a, rawn lang fo tura ngaih a nih thu te, a zia lai leh a nasat lai te hi awm tura ngaih a nih thu te an sawi.
Thlasik laiin he hri hi a zia thin hrim hrim an ti a, mahse 2024 khan December ni 23-ah te pawh vawk thi chu a awm tho tih an sawi. 2025-ah pawh khan December-ah Mizoramah vawk a thih loh laiin thenawm state velah chuan a thi tho an ti.
June, July leh August vel hi a vanglai a ni thin an ti a, nikum pawh khan kum laihawlah a nasa a, kum tawp lamah a zia an ti. Nikum khan ASF vanga vawk thi hmasa ber chu March ni 20-a mi a ni.
2025-ah khan kum hmasate angin he hrileng hi a nasa lo hrim hrim an ti a, vawk thi leh suat pawh kum hmasate aiin a tlem tih an sawi.
AH&Vety department-in an chhinchhiah danin, 2025 chhung khan ASF vangin Mizoramah vawk 9711 a thi a, vawk 3620 tihhlum/suat a ni bawk. District pariatah ASF hi finfiah a ni a, khaw 171-a chhungkaw 3867 a nghawng.
2025-a ASF vanga vawk thi zat
District Vawk Suat Khua Chhungkua
Mamit 273 167 7 122
Lawngtlai 1771 394 18 381
Siaha 3576 940 43 1381
Lunglei 812 1624 39 717
Khawzawl 1604 188 16 586
Champhai 515 221 14 216
Hnahthial 723 86 13 395
Aizawl 437 0 21 69