Ni 44 hnuah Tudor a chhuak

London club lian Tottenham Hotspurs chu season kal mekah an che chhe viau a, tlakhniam hlauhawmah an awm mek. An chet chhiat zawn em vangin manager lailawk Igor Tudor chuan ni 44 hnuah Tottenham a chhuahsan. Lazar-a kha ni li hnu ah kaihthawh a ni, a thawh leh laiin Tudor erawh n 44 hnuah petchhuah a ni ve thung.
Europa League champion Tottenham hian February 14, 2026 khan an manager Thomas Frank an ban a, a hmunruak luah lailawktu atan Igor Tudor an la lut. Tudor hnuaiah hmasawn an inbeisei laiin result tha an nei thei ta tlat lo thung. Tudor hnuaiah hian inelna hrang hrangah vawi sarih an khel a, vawi nga ngawt tlawm zawkah an tang. An khelh chhiat zawn vangin EPL atang tlakhniam hlauhawmah an awm mek a, 17-na an ni mek. A him chin chiah chiahah awm bawk mah se an hnuai chiaha awm West Ham United nen point khat chauhin an inthlau a, hei hi an dinhmun tiderthawng zualtu a ni,
Tudor hnuaiah an chetchhiat em vangin Tottenham thuneitute chuan Tudor hi ban mai an duh a, International break a lo awm hlauh bawk nen inbanna hun remchang tha an hmu a ni ber mai. Nottingham Forrest lakah 3-0 ngawta an tlawm hnu khan Tudor ban turin thutlukna an siam niin tarlan a ni a. Tottenham chuan an manager Igor Tudor nen an inthen tak thu an sawi a. Inhriatthiam tawnnaa inthathen an nih thu an tarlang tel bawk. Tudor a chhuah lai hian a assistant Bruno Saltor chuan Spurs training a la kaihruai rih a. Hetihlai hian goalkeeping coach Tomislav Rogic leh physical coach Riccardo Ragnacci te chu an chhuak ve nghal thung.
De Zerbi an duh
An ban tak Igor Tudor hmunruak luahtu atan Brighton manager hlui Roberto de Zerbi an duh a. An hnen a pan duh a nih chuan Spurs hian De Zerbi hi an manager nghet ni turin lak luh nghak an duh hial nghe nghe.
Brighton a hming chher tak De Zerbi hian season tir lam khan French club Marseille a chhuahsan a, club enkawl nei lovin a awm mek. Tottenham manager nih a hnial lo viau nasa, season thar atang law law a enkawl a thlang zawk niin tarlan a ni. Tarlan tawh angin Tottenham hi EPL Table-ah 17-naah an awm mek a, championship lamah tla hniam thut thei dinhmunah an ding. An dinhmun a him lo em a, hun harsa an tawh laia enkawl chu a chakawm fahran dawn lo. Heti a nih vang hian Spurs hian De Zerbi hi an hmin thei ang em tih a la chiang lo.
De Zerbi an ruai thei ta lo a nih chuan Tottenham chuan Sean Dyche chu hun rei lote chhung atan lo rawih rih an tum dawn. Sean Dyche hi EPL a team talbuai, season tawp dawn hnaih lama chhanhim thiam a ni a. Tottenham in tuna an mamawh leh an tana manager fuh ber ni thei leh awhawm ber a ni hial mai thei. Manager thar tur zawng mek Tottenham tantute chuan an manager hlui Mauricio Pochettino hruai kir leh an duh a. Pochettino hian World Cup-ah USA a kaihruai dawn si a, season tawp hma chuan an ruai thei dawn lo chiang thung.