Ni 5 chhung State Day of Prayer

Ni 5 chhung State Day of Prayer
Mizoram State Day – February 20 denchhenin State Day of Prayer Committee chuan ni 5 chhung – February 16-20 inkar hian ram tan tawngtai neih a ni dawn a. Mizoram hmun hrang hrang bakah state pawn lam thlenga neih tuma inruahman a ni.
State Day of Prayer Committee chairman Rev Lalramliana Pachuau chuan, hei hi party leh sawrkar hmalakna ni loin, kohhran hrang hrang intelkhawm hmalakna a ni tih a sawi a. Ram tana tawngtai ni in a tum ber chu, Zoram mipui a ruala thinlung pumkhat pua ram tana tawngtai a thatna leh hlutna hriat tlan a tul tih hriat tha an tih vang a ni tih a sawi.
Kuminah State Day of Prayer hi Lammualah February 16-20 chhung hman a ni dawn tih sawiin, kumin hi Mizorama harhna a thlen kum 120-na a ni a, harhna a lo thlen leh theihnan tawngtai chu State Day of Prayer-in a tum bulpui pakhat a ni a, he ni 5 chhung hian ram tana chawngeia tawngtaiho buatsaih nise, an ti tih a sawi a ni.
State Day of Prayer neih hi kumin hi a tum thumna a ni a, kum dang aia uar zawka hman an duh tih State Day of Prayer Committee working chairman, minister F Rodingliana chuan a sawi a. February 20 hian two wheeler rally neih a nih dawn bakah Aizawl hmun 4 – Chaltlang Dawrkawn, Chanmari, Vaivakawn leh Sikulpuikawn atanga chhuaka Lammual-a lut turin ‘Prayer Walk’ neih a ni dawn tih a sawi.
Zawhna chhangin Committee hruaitute chuan, party mal leh sawrkar hmalaknaa a lan theih avangin mawhphurtu pawh an inthlak phah a, party mal thiltih ni se, inhnamhnawih duh lo tur an awm nual a, party dang pawh sawrkar se tih zel an duh tih an sawi. Kohhran pawl hrang hrang leh tlawmngai pawl, mimal thahnemngai telna a ni tih an sawi bawk.