Ni hnih chawlh hnuah DR Congo-ah indona chhuak leh

Ni hnih chawlh hnuah DR Congo-ah indona chhuak leh
Rwandan sorkar thlawp M23 helte chuan ni hnih inbeihna an chawlhsan hnuah South Kivu province-ah Congolese sorkar sipaite an bei leh tan.
East & Southern African hruaituten a rang thei ang leh intiamkamna awm lova inkahhai puang tura an ngen atanga ni thum hnu, Thawhlehni tuk atang khan laipuiin an bei leh tan a ni.
Helho hian DR Congo khawchhak lam ram zau tak, an khawpui lian, Goma pawh telin, an la tawh.
South Kivu khawpui, heng laia khawpui pawimawh tak dang, Bukavu lak tumin an pan leh mek.
UN-in a chhinchhiah dan chuan January thla tir atanga indona chhuak avang hian mi 2,900 vel an thi tawh.
Mi 7,00,000 velin loh theih lohvin an in tlanchhiatsan an ngai a, mi sang tel inhliam an awm tawh bawk.
Tuesday-a inbeihna hi Bukavu atanga km 70 vela hla leh South Kivu thlawhna tumhmun atanga km 40 vela hla, Ihusi-ah a intan niin venhim hna thawktute chuan news agency AFP hnenah an sawi.
Congo River Alliance (French tawng lamtawia AFC an tih), M23 pawh an telna hel inzawm khawm thupuangtu chuan an indo thlawhnate pawh Bukavu indonaah hian an thawh chhuahpui mai thei tih a sawi.
Lawrence Kanyuka chuan Congolese thuneituten Bukavu bula civil mite thata puh vanga sipai 84 an mansak chungchang sawiin, “He pawi hi an lo khawih tak tak a nih chuan kan mite himna tur chuan a tawp thlengin mawh kan phur dawn a, nuai chimih an ni ang,” a ti.
Hetih lai hian an chenna tlan chhuahsan tam tak chu M23 hian kir turin an ti lui nia sawi a ni.
M23 erawh chuan hei hi an pha a; mahse, French broadcaster RFI chuan tlanchhiate awmna camp lian tak tak thenkhat chu tihchhiat a nih thu leh a khawsate chu loh theih lohvin indona hmun, an khuaah an kir leh phah niin an tar lang.
UN hnuaia mi tanpuina lam buaipuitu, Ocha chuan M23 hian tlanchhiate hi Goma-ah darkar 72 chhunga let leh vek turin an ti niin a puang bawk.
M23 hi Tutsi hnam niin hnam tlem zawkte dikna chanvo an neih theih nana bei niin an insawi a, DR Congo sorkar hian an ram khawchhak, ram leilung hausa lai thunun tum vanga hetiang hi che ni zawkin an sawi thung.
DR Congo leh UN chuan Rwanda-a Tutsi hnamin an thunun hneh tak sorkar chuan M23 hi an pui nasa niin an sawi a, Kigali erawh chuan a pha nasa thung.
Tun hnai khan an sorkar thuneitute chuan an ramria indona nasa tak awm mek chuan an ram a tiderthawng niin an sawi.