Ni khatah J&K-a ruah kaihhnawih chhiatnaah mi 10 thi

Ni khatah J&K-a ruah kaihhnawih chhiatnaah mi 10 thi
Jammu & Kashmir-a ruah nasa tak sur avanga lei minin Thawhlehni chawhnua Trikuti tlanga Hindu sakhaw hmun thianghlim, Mata Vaishno Devi pana kalte a hnawlnaah mi paruk an thi a, mi dang eng emaw zat hliam an awm bawk a. Heng mite Thawhtanni atanga khuarel chhiatna avanga he state-a thi hi mi 10 an ni tawh.
Chhiatna thleng avang hian Reasi district-a biakzina kal hi tihtawp lailawk a ni tih thuneituten an sawi.
Lei hi Adhkwari-a Inderprastha Bhojnalaya bulah tlai dar 03:00 vela min niin tlang chhip thleng tura km 12 vel kal ngaiah a lai vel tak a ni a. Chhanchhuah leh mi zawn hna thawh zui nghal a ni a, sipaite chuan ‘nunna chhan tum leh a mamawhtute pui turin theihtawp an chhuah’ tih sawiin hmun himah mi tam tak an thiar chhuak bawk.
Ruah sur nasa avang hian Anantnag, Kishtwar, Doda, Kathua, Ramban, Udhampur, Reasi, Rajouri, Jammu leh Sabma district-ah red alert tihchhuah a ni bawk.
Biakzin hi himna ngaihtuah chunga chawlh lailawk niin hmun thianghlim enkawltute pawhin pathian be tura kalte pawh an zin hun thlak mai turin an ngen a. Thawhlehni vek khan Himkoti trek route zawha kalna pawh khar a lo ni tawh bawk a, kawng hlui zawk hi chhun dar 01:30 vel thleng zawh phal ni mah se ruah a tam tak avangin khar leh rih a ni.
Jammu district-ah chuan zan lama chet velna pawh khaw awm danin a zir loh avang leh tui lian avangin khuahkhirh a ni.
Jammu & Kashmir-ah hian ni thum chhung ruah tam tak a sur tawh a. Thawhlehni chawhma khan Doda district-a ruah bawhawk surin chhiatna a thlenah mi pali an thi bawk a. Ruah sur thut hian sabereka khuangkaih siamin chenna in 10 chuang a hnawl chhia.
State pumah ruah sur nasa leh chhiatna dang thlengin a nghawng avangin optical fibre cable a chhiat nasat em avangin inbiakpawhna pawh a chhe hle a. Northern Railway chuan Katra, Udhampur leh Jammu station-a lut leh chhuak tur rel 18 chu an zin tur an thulhtir bawk.
Lui lian leh an peng zawng zawng deuhthaw chu hlauhawm chin chhinchhiahna chung lamah an luang tawh a, a la luang lote pawhin an hnaih zel a, hmun hniam lai leh kawngpui tam tak a chim tawh a. Thuneitute chuan mipuite chu awih leh tui hnaihah awm lo turin an ngen.
Pahalgam-a Betaab Valley-ah chuan Sheshnag Nallah chuan a chim san lai ber ni thin, feet 5.68 chu pelin feet 6.02 a chim tawh a. Tui len theihna chin hi feet 4.59 niin hlauhawm chin chhinchhiahna chu feet 5.09 a ni.
Thuneitute chuan Jhelum River pawh ruah a sur zel avangin Thawhlehni zan atang khan a chim chin a sang zual hle tawh tih an sawi a. Sheshnag Nallah nena a chim chin a sang zel chu a hnar lamah ruah tam tak a sur vang niin an sawi.
Jammu-Pathankot leh Jammu-Srinagar telin national highway tam tak khar a ni a, district inkalpawhnate pawh lei min, tuiin a chim leh lei chhia avangin khar a tam hle bawk.