July ni 19 khan Zoram Research Foundation (ZORF) leh Aijal Club tang dunin Aijal Club-a RB McCabe Hall-ah Mizoram sum dinhmun zirhona hun ‘Symposium on State Finance: Issues & Challenges’ an buatsaih a, he huna tel ve chief minister Lalduhoma’n ni tin hian ka inzir reng, a ti.
Chief minister, finance changtu ni bawk hi nilengin a tel ve a, a buatsaihtute chuan panelist-te’n thu an sawi zawhah sawihona hun hman zui a ni ang a, chawhnu lamah chief minister hi a tel ve turah an ngaih laiin nilengin a tel ve a ni.
“Kei pawh inzir mek ka ni a, ni tin hian ka inzir ve a ni. Chuvangin, in thil sawite atangin zir belh tur leh hriat belh tur tam tak ka neih ka ring tlat a ni,” chief minister chuan a ti.
A buatsaihtute hian panelist atan mi pali an sawi a, an zinga pathum chu political party-a active taka inhmang te an ni; Congress president hlui Lalsawta te, Adviser to CM ni lai TBC Lalvenchhunga, ZPM leh MNF party-a an Media Publicity Board vice chairman J Malsawmzuala Vanchhawng te an ni. Academic lam atangin Pachhunga University College-a economics zirtirtu Dr Daniel Lalawmpuia a tel bawk.
Sum enkawl thiam tiin finance minister hlui Lalsawta’n he hunah hian fak a hlawh a, thusawitu engemawzatin an fak. Chief minister pawhin a fak a, “Assembly House-ah pawh ka fak kha,” a ti.
ZORF ziaktu lian Rochamliana sawi danin hetiang hun hi inthlan hma atanga neih an lo tum tawh a ni a, inthlan boruak avangin a hun an sawn hla a, “Tu pawh sorkar se neih kan tum, kan inbuatsaih reng, ZPM party min tihtir anga sawi hi thudik lo hulhual a ni,” a ti.
Ni tin hian ka inzir reng: CM
Get real time updates directly on you device, subscribe now.