Ni tin HIV kai 5.5

On Jul 11, 2025 17 0
2024 April atanga March 2025, kum khat chhung khan, Mizoramah HIV kai hmuh thar 2021 an awm a; chawhrualin ni tin mi 5.5 ang a ni.
He report hi tun hnaia Hnahthial District Aids Prevention and Control Committee thutkhawmnaah pholan a ni.
Ni tin mi 5.5 hi a namai lo hle. Hei mah mah a tlahniam zawnga kan kal tawh hnu a la ni lehnghal.  MSACS lam chuan, kum 5 vel kal ta atang khan a tlahniam zawngin kan kal ve tawh, an ti a nih kha. 
Ngaihruatna chhiarkawp (Hypothetical) han hawh zawk ila. A tlahniam zawnga kan kal ve tawh avangin, kan hma kum 5 lo la awm leh turah hian, a tlakhniamna hi kum hmasa berah 100, a dawtah 150, chutiang zelin kum tin a tlakhniamna hi 50 zelin pung ta se, kum 5 lo awm leh tura a tlakhniamna belhkhawm hi 1000 a lo tling tawh ang a. Tuna kan behchhan kum khat chhunga HIV kai zat 2021 atang hian 1000 kan paih chuan, 1021 a lo chhuak a, chu chu chawhrualin HIV kai zat chu ni tin 2.7 a lo ni tawh dawn a ni. Hei pawh hi state dang nena inkhaikhin ralah chuan, la sâng veng veng tak a ni. 
 HIV dona kawnga hmalakna lo kalpui tawh dan leh, a tlakhniam chak loh dan han ngaihtuah hi chuan, kum 5 lo la awm leh turah hian tuna chhût chhin ang em hi chuan kan tlahniam chak kher lo maithei. Chu chuan kan dinhmun chhiat tawhzia leh, tanlak kan ngaih nasat tawhzia a lantir lehzual a ni.
Tuna report-a kan hmuh dan chuan, HIV kai zat tlakhniam chhan hi ‘needle syringe exchange programme’ leh ‘condom sem’ bakah ‘awareness’ pek that vang nia ngaih a ni. Heng thil pathumte hi tunhma kum tam tak chhunga lo kalpui thin tawh dan tho kha a ni a; mahse, tun hnai kum 5 chhung khan ngawrh lehzuala kalpui a nih avangin HIV hi a tlahniam ta nia ngaih theih a ni ta a. Heng thil pathumte hi “HIV dona Package” tha tak chu ni ta berin a lang ta a ni!
  Chuti a nih chuan, HIV dona programme lianpui pui leh langsar tak tak lo kalpui thin tawhte ai khan, tuna a tlakhniam chhan nia ngaih thil pathumte khi nasa lehzualin, a let tam taka nasain kalpui ni ta mai se, chu chu kan thatpui ber tur a ni ta tihna a ni mai lo maw?