Ni tin mamawh thil la harsa
Kawng chhiat vangin ni tin mamawh thil a thleng mumal lo rei tawh a, Thawhtanni thleng khan a la thleng tha lo.
Dawrkaite sawi danin, ni tin mamawh thil hi lak tur a awm mumal lo rei tawh a, dawr thenkhatin la hralh loh an la neihte hi lei tur a la awm a ni mai a, thil engemaw zat chu a thar lak tur a awm mumal lo rei tawh.
Bawnghnute a thleng lo rei tawh a, mipuite hman ber amul gold chu chawlhkar hnih chuang a thleng tawh lo.
Bawnghnute phurtute an thang rei thin a, kawngah ni 10 te an thang avangin kawngah a chhe hman thin a, a chawluttute tan a chhia zawng zawng nena lo khul thu a awm si lo a, an lo khul vek dawn lo a nih chuan a thawntute’n an thawn ngam bik lo a, hei vang hian bawnghnute hi a thleng lo rei tih thu dawn a ni. Bawnghnuteah hian good life erawh a thleng leh zeuh thin.
Dawrkaite sawi danin, biscuit lak tur a vang a, biscuit a van bakah a chi hrang lak tur a vang. Chips pawh a thleng mumal lo a, a chi hrang a vang bawk. Chips-ah hian a lar deuh lay’s leh kurkure te a vang zual a, noodles pawh a vang. Magi pawh kar hnih chuang a thleng tawh lo an ti.
Tel pawh a thleng tha lo a, Thawhtanni khan tel hman lar deuh chu agency-ah a awm lo. Chutih laiin a hlawma (whole sale) pe thin dawr lian thenkhat chuan an nei.
Tlang kawnga tlan, motor lian ni lova bungraw la thin an awm a, anni hian ni tin mamawh thil thenkhat chu an chawlut thei.
Bungrua a thlen mumal loh avangin in sak lai chawl te pawh an awm a, cement pawh a van bakah a man a pung; Rs 500 man kha Rs 680-ah te a kai a, Rs 600-ah te a tla leh.
Khamrang leh Kawnpui inkar kawng chhia hian Mizoram a nghawng nasa a, kawng hi siam mek a ni. Tun hnaiah lirthei ke ruk nei leh ke 12 neite an tlantir a, ke 14 nei leh ke 16 neite la dintir an ni. Kawng siam a tluan nan bungraw phurtute an ding tan bawk. Kawng siam hnuah lirthei an thang rei lo ta deuh a, Mizoram Truck Drivers Association hruaitute chuan tunah chuan Khamrang leh Kawnpui inkar hi zan khat te an thang tawh a, a hma ai chuan zia tak a ni an ti. Mahse zan khat thangte hi a tifuh zual an nih thu an sawi.