Ni tin mamawh thilah harsatna

Ni tin mamawh thil lakluhna kawngpui pawimawh a chhiat avangin Mizoramin harsatna a tawk mek a, lirthei khalhtute leh a neitute’n kawng laka harsatna an tawh bakah ni tin mamawh thil thenkhat a van avangin mipuiin harsatna an tawk mek.
Kar hmasa lamah tuialhthei leh ni tin mamawh thil hrang hrang a van avangin mipuiin harsatna an tawk tawh a, chumi hma chawlhkarah pawh harsatna hi a thleng tawh.
Kawnpui leh Sairang inkar kawng a chhe zual a, heng lai vel hi nikum lamah pawh a chhiat avangin lirthei neitute leh mipuiin harsatna an lo tawk tawh. Tun hnaiah he harsatna hi a zual leh a, chawlhkar hnih chuang chu bungrua a thleng tha lo tawh.
Dawrkaite sawi danin, tunlaiin tel leh bawnghnute a thleng mumal lo a, a thlen loh avanga lak tur a awm loh chang te pawh a awm. Bawnghnute leh tel hi chawlhkar hnih chuang kal taah pawh khan a thleng tha lo tawh.
Coffee, real (theitui) te pawh a thleng tlem an ti a, chips thenkhat thleng tha deuh a awm a, a chi dang thleng mumal lo a awm avangin duhthlan tur a vang an ti. Ice cream pawh a thleng tlem tih an sawi a, noodles pawh a thleng tlem a, hanawhna hlo pawh a vang an ti.
“Alu, purunsen, artui, dailuah, chini leh chite hi chu a thleng tha a, thil dang zawng hi a vang tiin a sawi theih ang,” dawrkaite chuan an ti.
July ni 19 atangin tuialhthei phurtute an nuar a, kawng a chhiat avanga an nawrh hma hian tuialhthei hi Aizawlah a hma angin a tam lo hman tawh. An nawrh hnu, chawlhkar liam taah khan tuialhthei hi a vang a, filling station-a la turin coupon a ngai thin. Chutih laiin black market-ah lei tur a awm reng thung.
Kawnpui atanga tlang kawnga phurh theih thil thenkhat a vang lo deuh a, mahse he kawngah hian lirthei lian an tlan loh avangin ni tin mamawh thil hi tam tham a thleng thei lo.