NI ZA(100) INHLAWHNA

By Zion Lalremruata
1. May 8 a ni a. Khua a sâng tha viau mai. Kan hriat theuh angin tunhmaa la thleng ngai lo Covid hripui chuan khawvelah thihna leh natna namen lo a rawn thlen a, kan ram bakah khawvel ram ropui zawkte pawn a tih ngaihna tak pawh hre loin kan buai tlang em em a ni. Kan state-ah pawh harsatna a thlen nasa hle a chutih rualin Kohhran leh tlawmngai pawl hrang hrangten Mizoram sawrkar theihtawpin an pui a, hmun dang aiin kan zia deuh a tih theih awm e. Covid bakah kan thenawm ram Burma buaina avangin raltlan tam takin kan ram an an rawn lut a, Sawrkar tan chuan a luhai thlak ngawt ta ve ang. Heng Burma raltlante leh Covid vanga harsatna tawk chhawmdawl ngai zualte tanpuina pein khang hun lai khan Mizoram dung leh vang, chhak leh thlang tiamin kan feh chhuak fo a, hrehawm ta ber chu kan tanpuina pek ho khuaah pawh han chawlh emaw han riah emaw a theih lo thin kha a ni. He hna hi kum hnih chhung aia rei mah kan kalpui ve a, khaw thenkhatah phei chuan thil lei chu sawi loh; han din zawk te kha an phal lo thin a, nun a chepin khawsak phung a buai phah hle a ni.
Harsatna nasa tak kan tawh mek laiin Mizoram chhungah chhuanchham em han sawi tur khua a awm manglo kha thil mak tak a ni. Tlema Covid vanga inkhuahkhirhna a ziaawm hnu khan kan khaw tlawh hrang hrangah te mi kan kawmin; an dinhmunte kan han zir chiang a Ni Za (100)/Job Card/NREGS an dawn that vanga harsatna em em an tawh loh thu an sawi tlangpui a ni. Ani lah taka he Ni Za inhlawhna scheme hi a chhawrtu mipui leh khawtlangin an tangkai puiin, hemi hnuaiah hian hmasawnna hmel thar tam tak hmuh tur a awm phah a, a hmang tangkai thiam apiangin an hlawkpui ber zel dawn a ni. Chiang zawka thil ka hriat duh vangin he Ni Za inhlawhna scheme hi RTI hmangin a enkawltu Department lamte ka han dil a, ka rin leh beisei aia nasain a changtu Department te hi an lo tang hle a ni tih ka han hmu a, a lawmawm hle a ni.
Tin, tun hnai lawk khan Puducherry Rural Development Minister AK Sai J Saravanan Kumara chuan Mizorama Ni Za(100) inhlawhna kalpui dan zirchiang turin Mizoramah a rawn zin vang vang a, an sawi danin Puducherry state-ah chuan Ni Za inhlawhna hi 20% bak an thawk hman lo a ni awm e; nimahsela, kan state ah erawh 90% kan pel zel a ni si a; hei hi thil chhinchhiahtlak tak a ni. Hetiang taka mipuite tana hnathawh tur siam saktu Chief Minister leh Finance Minister ni bawk Pu Zoramthanga te, a changtu Minister Pu Lalruatkima leh a thawhpui Rural Development Department te an fakawm hle a ni. A hnuaiah hian 2019-2022 chhunga Mizorama Ni Za inhlawhna kalpui dan chiang zawkin ka han tarlang e.