NIA-in Pahalgam beihna bultumtu berah TRF chief Jutt puh

NIA-in Pahalgam beihna bultumtu berah TRF chief Jutt puh
India-a firfiaka chetna chhuitu pawl, National Investigation Agency (NIA) chuan Pahalgam-a mi firfiakte chetnaah Pakistani an inrawlh ngei tih a tichiang ta a. Sajid Saifullah Jutt-a chu April 22-a khualzin 26 thahnaah khan a bultumtu leh phiar kual bertu niin an puh.
Pakistan-a Kasoor-a cheng, Jutt-a hi Lashkar-e-Taiba (LeT) peng pakhat, The Resistance Front (TRF)-a an hotu pa ber a ni a. NIA chuan man a nih theih nana kawhhmuhtu hnenah Rs nuai 10 pek an tiam a, Unlawful Activities (Prevention) Act (UAPA) tlawh chhanin ‘mi firfiak’-ah an puang bawk.
NIA hian Jammu & Kashmir-a khualzinte tlawh nasat hmuna firfiakte chetna hi thla riat a chhui hnuah an chhui chhuah an theh lut ta a ni.
An mi rinhlelh an tar lan dang pathum chu Pakistani tho niin Suleimani Shah, Hamza Afghani leh Jibran te an ni a. Heng mite hi July 28-a Jammu & Kashmir tho, Mahadev, Dachigam-a beihpui thlaknaah thah an lo ni tawh nghe nghe.
NIA-in Thawhtannia an thubuai chhuia an thil hmuhte Jammu court-a an thehluhah hian tual chhung mi pathum – Bashir Ahmed Jothar, Parvez Ahmed Jothar leh Mohammad Yusuf Katari te chu mi firfiakte ei tur leh kal zel dan tur lo kawhhmuhtu niin an tar lang a. Anni bakah mi dang hming pathum dang an tar lang bawk.
Chhuitute chuan Bashir leh Parvez hian Pahalgam-a mi thattute hi Hill Park-ah April 21 zan khan an mikhual niin an tar lang a. Mohammad Yousuf-a hian South Kashmir-a ramngaw chhah laia hruai kual ve thungin pawi an khawihna hmun kha a thlenpui niin an sawi bawk.
NIA hian thla riat an chhui chhungin mi 1,000 chuang thu an zawt fiah a, court-ah hian an thil hmuhte phek 1,597-a chhah thehlutin LeT leh TRF tha thawhna hrang hrang an hai chhuak tih an sawi.
NIA chuan LeT/TRF leh mi firfiak pali chu Bharatiya Nyaya Sanhita (BNS), 2023, Arms Act, 1959 leh UAPA, 1967 tlawhchhanin thubuai siamsak an ni tih an sawi.
Tar lan tawh thin angin April 22, 2025-a Pahalgam hmun beihnaah khan mi 26 an thi a, a tam zawk hi khualzin an ni a. A beitute hian an mi thahte hi eng sakhaw zuitu nge an nih an zawt a, Hindu chu an bitum bik nia sawi pawh a awm.
Indian hnuchhuituten Pakistan leh an rama awm firfiak pawlte tiha an chhal chungchangah hian Islamabad chuan engmah a la sawi lo.
Thil thlen hlimah khan New Delhi chuan Pakistan puih firfiak pawlte tihah puh nghalin nuclear ralthuam nei ram hnih inkarah pawh buaina chhuakin ramri-ah ni li chhung an indo phah a, kum tam tak hnua an indo nasat ber tum a thleng hial a ni.