Niger-ah sipai ten sorkar paihthla

West African ram Niger sipaite chuan national TV-ah sorkar paihthlaa sorkarna an lekkawh thu an puang.
Constitution an thiah thu leh institution tin te titawp lailawkin ramri an khar zui nghal thu an sawi bawk a.
Nilaini atang khan Niger President Mohamed Bazoum chu presidential guard ten an hreng tawh a.
Hetih lai hian US Secretary of State Antony Blinken chuan Washington chuan President Bazoum chu a thlawp tlat tur thu a sawi a.
UN Secretary General Antonio Guterres pawhin president chu a biak tawh thu leh UN-in a thlawp tlat thu a hrilh thu a sawi bawk.
Bazoum hi West Africa-a Islamist militancy beihnaah Western ally a ni a.
Niger thenawm ram pahnih Mali leh Burkina Faso te chuan tun hnaiah jihadist te avangin sorkar paihthlakna an lo tawng tawh bawk a.
Heng ram pahnihah te hian military leader thar te chu Niger pawh lo awp tawhtu leh tun thlenga awmze thuk tak la nei France nen inbakaihna a thleng zui vek a ni.
TV kaltlanga thu puanchhuahna an neihah Col Maj Amadou Abdramane chu uniform ha sipai pakua ten hual bawkin, “Keini defence leh security forces te chuan sorkar kan titawp a. A chhan ber chu security dinhmun tlahniam zel leh mirethei leh economic leh social governance tlahniam zel vang a ni,” tiin a sawi.
Niger rama institution tinte chu suspend vek a nih thu leh minister tin te chuan ni tin inrelbawlna mamawh te an ngaihtuah zui ang, a ti a.
“Ram pawn lama te inrawlh lo turin kan ngen a. Lei leh vansang ramri tinte pawh khar rih vek a ni ang,” tiin a sawi bawk a. Hei bakah hian zan lam curfew pawh puanin a awm zui bawk.
Col Maj Abdramane chuan sipai te chu National Council for the Safeguard of the Homeland (CNSP) aiawh hna an thawk mek a ti bawk a.
Sipai tena TV kaltlanga thupuan an neih hnu lawk hian Blinken chuan President Bazoum chu chhuah zalen nghal turin a ngen a. New Zealand a tlawhnaah news conference nei zuiin ‘tharum hmanga thuneihna chan tuma constitution tihchhiat tumna a ni’ tiin a sawi.
West African economic bloc Ecowas te chuan sipaite chetlak dan chu a na thei ang bera an dem thu an sawi zui bawk.
Hetih lai hian Niger capital Niamey ah chuan President Bazoum thlawpa kawtthlera punkhawmna siam niin president laka rinawm armed forces te chuan national broadcaster leh a chhehvel an la veng bawk.
Niger ram hian Islamist insurgeny lian tak pahnih south-west lamah pakhat kum 2015 a Mali tibuai vek thei leh south-east lamah Nigeria a inbun jihadist te a hmachhawn mek bawk a. Heng militant group te hi al-Qaeda leh Islamic State te nena inzawmna nei an ni bawk.
President Bazoum hi kum 2021 a thlan tlin niin France mai bakah Western ram te nena inkungkaihna tha tak nei a ni.
Niger hian kum 1960 a France atanga a indan hnuah sorkar paihtlakna tum li tawng tawhin paihthlak tuma beihna phei chu a hmachhawn nual tawh a ni.