Nigeria-a IS chetnaah mi 29 vel thi

Nigeria hmarchhak, Adamawa state-a mi beihna thlengah silai kengten mi 29 vel an that niin tual chhung thuneituten an sawi.
Islamic State group (IS) chuan pawikhawihna thlentu an nih thu an sawi a, a chhan erawh an sawi lo.
Thuneitute leh tual chhung mite chuan firfiakte hian mipui pungkhawmna football khelmual chu an luhchilh a, an pawngkah chiam a; in, biak in leh lirthei an hal niin an sawi.
State Governor Ahmadu Umaru Fintiri-a chuan tlawhin thlalak a dah chhuak a, pawikhawihna thleng chu ‘kan mihringpuite sawisakna’ a nih thu a sawi.
Governor media office chuan ‘Gombi tual chhung sorkar huam china Guyaku’ beihna hian darkar eng emaw zat a awh niin a sawi.
Fintiri-a’n chhiatna thlengte a fan kualnaah a thupuangtu chuan Facebook-ah ‘khawtlang boruak a la buai a, lungngaihna leh hlauhna a la nasa hle’ tiin a ziak.
Chhungkaw tam tak chuan ‘pawikhawihna thleng leh tur ngaihtuahin an chenna in an chhuahsan’ niin thupuangtu chuan a sawi bawk.
Fintiri-a chuan X-ah, “Remna siam leh mipuiten an chenna in hima an inhriat leh theih nan venhim hna kan tichak nghal,” a ti.
Video clip pakhatah chuan thuneitute chuan khaw chhunga primary sikul leh a bula lirthei kang tawh eng emaw zat an enfiah lai a lang.
Video dang, Nigerian broadcaster TVC News-in a lakah chuan Sangere Mapidni biak in chhung a chhe nasa hle tih a lang bawk a, meiin a kanna hnuhma, drum kit thal henghuang leh keyboard chhia te pawh a lang.
TVC report-ah hian biak in pawn lama mite thu sawi ri pawh a lang a, heta an sawi dan chuan pawikhawihtute hi sikul lam atanga lo kal niin mi an pawng kah a, mipa 28 leh hmeichhia pakhat an thi niin an sawi.
Thuhretu zingah hian kohhran pastor pawh a tel a, pawikhawihtute hian silai hmet puak chungin tlanchhiate khuaah an zui lut a, in leh biak in an hal niin a sawi.
“Mipui aiawhin he hmunah hian venhimna kan mamawh tak zet tih ka sawi duh a ni,” a ti bawk.
Cameroon nena inrina bul maia awm hmunah hian tun hnaiah tual chhung mi sual pawl leh IS nena inzawm pawlte chuan beihna an thlen fo tawh.
Thla tir lam khan Islamist pawl firfiakm Boko Haram leh an zawmpui, Islamic State West Africa Province (Iswap) mi leh sa mi 400 vel chu a huhova an thubuai ngaihtuah niin hremna pek an ni.
Kum 2009 khan Boko Haram hian Nigeria hmarchhak bialah helna an kalpui tan a, hemi hnu hian mi sang tam tak an thi a, mi maktaduai hnih chuangin hmun him dang zawngin an insawn chhuah phah tawh niin tanpuitu pawlte chuan an sawi.
Jihadist buaina hi an thenawm ram – Niger, Chad leh Cameroon-ah te a darh nasa hle.
Africa khawmualpuia mihring tamna ber, Nigeria-ah hian sorkar chuan anmahni inrintawk lohna sang zel zel tihtawp tumin hma a la nasa a, January thlaah inthlanpui hmabak mek niin ram dangte pawhin jihadist an ngam lo leh vantlang an him lo lutuk hi an sawisel tan tawh.
Nikum kum tawp lam khan US chuan Nigeria hmarchhak lamah IS nena inzawmna nei firfiakte lakah beihpui a lo thlak tawh nghe nghe.