Nigeria-a khaw rûnnaah mi 100 vel that

Nigeria-a khaw rûnnaah mi 100 vel that
Nigeria hmar lam laili laia zan lama khaw rûnnaah mi 100 vel bawr thah an ni a, Amnesty International chuan sorkar chu ‘Benue state-a ni tih deuhthaw thisen a luang’ chu tihtawp dan ngaihtuah vat turin a nawr.
Zirtawpni zan tlai tawh tak atanga Inrinni tuk thleng khan Benue-a Yelwata khua hi beih niin Amnesty chuan a sawi.
“Amnesty International chuan Bunue state-ah hian mi sual ralthuam kengte nasa taka an chetna thin hi a hria a. Heng inbeihna hian mi tam tak baihvaiin a siam a, a tam zawk lo neitu an nih avangin an ei tur thar pawh nasa takin a nghawng a ni,” tiin mihring dikna chanvo humhalhtu pawh hian X-ah an tar lang.
“Nigerian thuneituten tharum thawhna an hmeh mih zawh loh avang hian mihring nunna leh khawsaknain a tuar a, chet chhuah thuai a nih loh chuan an tuar zel ang,” an ti a. Tun tum beihna thlengah pawh hian mi tam tak chin hriat an la ni lo niin an sawi.
State governor thupuangtu, Tersoo Kula-a chuan khaw beihna hian darkar hnih chuang awhin ‘chenna in tam tak hal’ a ni tih AFP news agency hnenah Inrinni khan a sawi.
Sorkar leh police thuneituten Yelwata hi an tlawh a, anni chuan thi zat hi 45 an ‘finfiah’ niin a sawi ve thung bawk.
Police thupuangtu, Udeme Edet-a chuan khaw beihna hi a thlen ngei thu leh police pawhin an beih let thu AFP a hrilh a. Hetih lai hian khaw mite chuan thi hi mi 100 chuang a nih theih thu an sawi ve thung.
Bunue-ah hian tual chhung ran vulha ei zawngm a tam ber Muslim chi khat, Fulani leh lo neitu, a tam ber Kristiante hi ram leh tui inchuhin a khua khuain an inrûn fo thin.
Thla hmasa maiah pawh khan ran vulhtu nia hriat ten Gwer West-ah mi 20 vel an that a ni.