Nigeria-a thihchilh bomb puakah mi 23 thi
Nigeria-a thihchilh bomb puakah mi 23 thi
Maiduguri-a thihchilh ni ngeia hriat bomb puak avangin mi 23 an thi a, mi 108 chuan hliam an tuar a, tun hnaia Nigeria hmarchhak, Borno state khawpuia pawi khawihna rapthlak ber zinga mi a ni.
Thawhtanni zan dar 07:30 (India-a Thawhlehni zing dar 12:00) vel khan dak in, kar tin bazar lar tak leh University of Maiduguri Teaching Hospital te chu minute tlem te chhungin bomb hmanga beih a ni tih state police-in an sawi.
Khawpui chhunga hmun lun ber zinga mi, he hmunte hian ni khat atana Ramadan chaw nghei an tihtawp hnuah mipui an pungkhawm nasa hle a ni.
Nigerian sipaite chuan beihna hi Boko Haram firfiak pawl hriat hlawh takte tihah an puh.
Kum 2009-a ding, Boko Haram hi Maiduguri atanga indin niin Islamist pawl hmunpui ber a ni.
Sipaite beihpui thlakna nasa tak avangin ramri hmun hla zawkah ralthuam keng pawlte nawr chhuah an nih avangin state khawpui hi hun rei tak chu ralmuang tak a ni tawh.
Borno police chuan thuchhuah siamin, “Chhui tawh chinah chuan thil thlengte hi thihchilha beih a ni tih hriat a ni,” an ti a. A titute hi tute nge hriat chian tumin an chhui zui mek.
Bazara bomb puak hmutu leh a tuarte damdawi ina hruainaa puitu, Modu Bukar-a chuan AFP news agency hnenah, “Kan thut laiin puak ri nasa tak kan hria a. Mi zawng zawng chu hlauthawng takin an tlan nghal a ni,” a ti.
Nigerian President Bola Tinubu chuan Thawhlehni khan thuchhuah siamin he pawikhawihna a dem thu a sawi a, a tithinur hle a, ‘firfiak pawl rilru sual tak takte thiltih beidawnthlak tak’ tiin a sawi.
Venhim hna thawktu hotute chu Maiduguri-a kal tur leh ‘thil awm dan thlithlai’ turin a hriattir tih a sawi bawk.
Bomb puah hma darkar tlem teah venhim hna thawktute chuan zana Islamist fighter nia rinhlelhten Maiduguri khawpui pawn, Ajilari Cross-a sipai hmun an beih chu an lo kap let tawh.
Thawhtannia beihna lian tak thleng hian khawpuia Boko Haram helna kum rapthlak ber ber a tawp tawh nia ngai mipuite chu a tithinur hle.
Kum 2015 vel khan tharum thawhna nasa tak chu a tlahniam tan a; mahse, tun hnaiah Boko Haram leh jihadist pawl dang, Islamic State West Africa Province (Iswap) chuan Nigeria hmarchhak bialah beihpui an thlak thar nasa hle.
Thuneitute chuan khawpui chhung hmun hrang hranga himna tihchakna tura emergency leh security agency-ten hma an lak lai pawhin tharum thawhna nasa zawk a thlen theihna tur hlauhawm a la awm reng tih an sawi.