Nigeria-ah Bandit hotu leh a zuitu 100 vel that

Nigeria-ah Bandit hotu leh a zuitu 100 vel that
Mi sual rual (bandit)-te ho khawmtu rawng tak leh amah zuitu ni ngeia hriat mi 100 chu sipai tangruala beihpui thlakten Nigeria hmarthlangah an that niin thuneituten an sawi.
Gwaska Dankarami-a hi rei tak man leh thah tuma zawn tawh niin Islamic State nena inzawm pawla an hruaitu second-in-command a ni.
Gang hotupa hi Munumu Forest-ah a biru nia hriat a ni a, thuneitute chuan Zirtawpnia beihpui an thlaknaah hian an pawl tawmna hmun hrang hrang an hai chhuak bawk tih an sawi.
Kar hmasa tir lamah khan bandit-te hian Katsina State hmar lama Maigora-ah thingtlang khaw mi 43 hruai bovin mi pali an that bawk a, hemi hnu lawkah Dankarami-a hi thah ve a ni ta a ni.
Police chuan mi hruai botute man chhuah tum hian venhim hna thawktu tam tak an dah an ni tih an sawi.
Dankarami-a hi thah a nih thu puan a nih mek laiin tun hma pawhin a thi nia sawi a lo awm tawh thin a, a lo thi lo tawh.
Kum 2022 khan hetianga beihpui an thlaknaah tho hian Nigerian Airforce chuan an that niin an lo sawi tawh a ni.
Katsina State Internal Security & Home Affairs Commissioner Nasir Mua’zu-a chuan thah a ni hi rahbi pawimawh a nih thu leh bandit-te laka an state-in beihna a kalpuiah hlawhtlinna pawimawh a nih thu a sawi.
“He hlawhtlinna hian Faskari, Kankara, Bakori, Malumfashi leh Kafur-a mi sual rual inzawmte chu an chet lak zelna tur chu nasa takin a tikhawlhkham dawn a ni,” a ti.
Venhim hna thawktute chuan beihpui an thlaknaah hian machine gun pahnih chhia leh tualchher shotgun an chhar nual tih an sawi.
Ningania beihpui an thlakna dangah venhim hna thawktute hian an commander telin bandit paruk an lo thah tawh bawk a, an kah hlim thenkhat tlanchhe hman an awm bawk.
Motorcycle pasarih an nangching bawk a, hei hian beihpui an thlak zelna kawngah pawh a pui hle.
Nigerian president hlui, Muhammadu Buhari-a chawr chhuahna, Katsina hi bandit tamna niin inhruai bo a tam a, nunna tam tak an la.
State Governor Malam Dikko Umaru Radda chuan sorkarin pawikhawihtute hmeh mih tumin tan a la nasa a, ramngawte pawh mi chengten an venhim theih nan an pui nasa tih a sawi.
Thuneitute chuan beihpui an thlakte chu bandit chet tamna, Katsina bakah Nigeria hmarthlang hmun dangah dan leh thupek kenkawhna tha a awm leh theihna tur a nih thu an sawi bawk.