Nigeria-ah inrukbona hluar zual zel
Nigeria inrukbo chuan zuallam pan zelin karkalta Inrinni khan zirlai thahnem tak leh hmeichhia pali te chu Gada, Sokoto ah rukbo in an awm leh tawh.
Local MP Bashir Usman Gorau chuan rukbo zingah hian zirlai 15 an tel tiin a sawi a.
Hetihlai hian Army te chuan karkalta Ningani a Kuriga khua aanga school naupang za chuang rukbo te chu an la zawng mek bawk a.
State governor Uba Sani chuan rukbo school anupang atangin 28 chu an tlanchhuak thei tiin a sawi a.
Karkalta Ningani a zirlai 280 chuang rukbo kha kum 2021 hnua school naupang rukbo tam ber tum a ni bawk.
Silai keng motorcycle a chuang te chuan primary leh secondary school naupang kum riat atanga 15 te chu an ru bo a ni tiin school thuneitute leh nu leh pate chuan an sawi a.
Nigerian sipai te chuan police leh tualchhung mite nena tang tlangin Kaduna state Kuriga awmna leh thenawm state thlengin rukbote zawn hna an thawk mek a.
Kuriga khuaa chhung tinte chu he rukbo kaihhnawih tuartu an ni vek tia sawi a ni a, zirlai naupang pakhat kum 14 mi chu silai keng te hian kapin damdawi In ah enkawl a ni mek bawk.
He thil theln hma ni chiahah Borno state ah hmeichhia leh naupang te rukbo in an awm tawh bawk a.
Sani chuan helai chhehvela sipai awm tam lo lutuk chu inrukbo tamna chhan tiin a sawi a. Rukbo nu leh pa te chuan vigilante group din an fate chu laklet leh ngei tumin hma an la bawk.
Nigeria vice president Kashim Shettima chuan Kaduna hi tlawhin governor nen inhmuhna an nei nghal dawn a. president Bola Tinubu chuan rukbo te chu chhanchhuah vek an nih theih a beisei thu a sawi bawk.
Nigeria-ah hian kum 2014 khan Chibok khuaah hmeichhe naupang 300 rukbo in an awm tawh bawk a. Hetianga inrukbo tam lutuk avang hian naupang sang telin school an kal duh loh phah tia sawi a ni bawk.
Kaduna inrukbo thleng hnuhnun ber chu July 2021 khan niin kha mi tum khan zirlai 150 chuang rukbo an awm a, tlanna sum pek a nih hnuah chhuah zalen an ni thung.
Kum 2022 khan Nigeria chuan ru bo tute laka tlanna sum pek dan hamngin a khap a, chutiang tite chu kum 15 lung in tan tur a ti a. Chumai bakah inrukbo chu thi tur hiala hremna lekkawh theih a ti bawk