Nigerian sipaiten helho ruk bo mi 62 chhanchhuak

Nigerian sipaiten helho ruk bo mi 62 chhanchhuak
Nigerian sipaite chuan an ram hmarthlang lama hel pawlte laka beihpui an thlakna kal mekah Kebbi leh Zamfara state-ah a hranga an chetnaah helhovin mi an hren zing 62 an chhanchhuak a, hel pahnih an that bawk tih sipaiten an sawi.
An ram hmarthlang lamah hian tun hnaiah mi sual rual, bandit tia an sawiten a hlawmin mi an ru bo nasa em em a, ramngaw chhah tha tak a awm avangin an biru pilril thei hle a. Heng pawlte hian khua, sikul leh biak inte an bei thin a. Pathianni pawh khan Kaduna-a biak in pahnih an luhchilhnaah inkhawm lai mi 160 chuang an hruai bo leh a ni.
Sipai thupuangtu, Lieutenant Colonel Olaniyi Osoba chuan mi an hrente an dahna hmun nia thu an dawn, Zamfara-a bandit-te birukna hmun hi an luhchilh tih a sawi.
Sipaite hian helhovin an hren mi 62 lo awmte chu an chhanchhuak vek a, an kutah an awm tih an sawi a, an chhungte hnena hruai turin hma lak zui mek a ni tih Nilaini khan an sawi.
Hmun danga beihpui an thlaknaah Kebbi-a Augie district leh an thenawm, Sokoto inrinaah helho an awm tih thu an dawn bawhzuiin Lakurawa-a an lambun bawk a, an hlawhtling hle tih Osoba-a chuan a sawi.
Nigeria hi US President Donald Trump-a pawhin a kamkhat a, an ram hmarthlang lama awm Islamist helho lakah Kristiante hum zo lovah an sorkar chu a puh a ni.
Krismas ni takah pawh khan US sipaite hian Nigeria hmarthlanga Islamic State awmte chu an lo bei tawh a. Nigerian sorkar chuan US puhna hi phain Kristiante chu Islamist fighter-ten an tum bik hran lo va, Muslim-te pawhin beihna an tawk nasa ve tho niin an sawi a ni.
Sipaite hian beihpui an thlak mek hi tun hnaia a hlawma mi ruk bona lian tak tak thlenga inhnamhnawih helho chhu chimit tur leh himna tha zawk aawm theihna tura tih an ni tih an sawi.