Nikhatah ram pakua thirsakawr a tlan kual hmanin record a siam

Nikhatah ram pakua thirsakawr a tlan kual hmanin record a siam
Krisjanis Ratiniks chuan darkar 24 chhungin Europe-a ram pakua chu thirsakawrin a tlan thleng vek hman a, Guinness World Record a siam. A hmaa hetiang record chu nikhata ram pariat tlan thleng hman niin, mi pathumin record hi an intawm a ni.
Krisjanis. kum 39, Italy hmarlam ramri atanga bul tanin, km 715.8 a thui a tlan hman a, record siam tuma bei a ni bawk a, a tlan chhung hian a chawl meuh lo. Italy atangin Switzerland a paltlang a, Liechtenstein, Austria, Germany, Luxembourg, Belgium leh a hnuhnung berah Netherlands a thleng ta a ni.
Krisjanis chuan, “Record siam tum hian kum tam ka lo inbuatsaih tawh a, computer hmaah thuin map ka en a, ka kal kawng tur ka riruat a. Hetih chhung hian miin record an lo siam zel a, chutah ka hun a lo thleng ve ta a ni,” a ti.
A hmain thirsakawra thui tak tak intlansiakah te pawh a lo tel ve tawh a, chuvangin darkar 24 chhungin km 650 te chu a tlan thei tih a inhre tawh a, mahse, record siam tur chuan chu mai chu a tawk si lo. “Ram pariat record hi khum theih tawh lo tur khawpa ngaih theih a ni. Mahse, thla tam tak ram hrang hrang awm dan leh an inhlat dan te, a kalkawng tur te ka zirchian hnuah record siamna kawng a inhawng tih ka hre ta a ni,” a ti.
Krisjanis chuan Italy atanga bul tan a, Netherlands thlenga thirsakawra darkr 24 chhunga tlan thlen hman tum chu ‘thil theih loh’ ang maiin a lang nain, kawng tawi zawk, kawng nual zawk tur a zir kual fê hnuah a tihdan tur a hrechhuak ta a ni.
Mahse, Krisjanis tana thil ruahman lawk theih loh awm ta chu khaw awmdan a ni a, hei hi a tibuai ta viau nghe nghe a ni. He a zinkawng, darkar 24 chhung hian darkar 10 chuang mah chu ruahin a sur hnan a, a zinkawng hmasa lam chanve vel chu a ruahman angin a kal thei a, mahse, chumi hnu lamah kawng a huh bakah, a vawt a, a tlan pawh a muang ta deuh a ni.
A zin kawngah hian ram a paltlang tur chu tlan pelhna tur kawng tawi ber a ngaihtuah zel a, ram pakhatah km tam a tlan meuh lo a, a tlan tawi ber chu Austria niin, he ram chhungah km 1 chiah a tlan hman tihah German ramri a thleng nghal a ni. Mahse, Austria-ah hian a thirsakawr ke a thep ta hlauh mai a, minute 5 vel hun a paih ta zawk a, hei bak hi chuan a zin kawngah hian a thirsakawr lamah harsatna a tawk zui ta lo a ni. Ram pakhat chhunga a tlan thui ber chu Germany niin, km 200 chuang a tlan ve thung.
A tawp lam darkar hnih chu Netherlands thlen hman tumin tlang ram kawngah km 60 chuang a tlan a. Krisjanis chuan “Record ka siam thei dawn lo emaw ka ti hman tawh a, kilometer tawp ber thleng khan record ka siam hman dawn nge dawn tih kha a hriat theih loh. Energy gel, cola leh tum ruhna nen theih tawpa chakin ka thlan a, record ka siam ta hram a ni,” a ti.