Nikum aiin a letin Aizawl boruak a bawlhhlawh

Boruak bawlhhlawh dan tehnaah nikum aiin a letin Aizawl khawpui boruak a bawlhhlawh a, boruak chhia pekchhuah nasat vang nia sawi a ni.
Mizoram Pollution Control Board chuan boruak bawlhhlawh dan leh khawchin ngun taka a zirchian thinna atanga a lan danin, Aizawl boruak a bawlhhlawh chho hle a, chu chuan sik leh saah nghawng neiin khua a lum zual hle nia a lan thu an sawi.
MPCB hotute sawi danin, kumin chhung ringawt hian boruak a bawlhhlawh chak hle a; boruak bawlhhlawh dan tihlanna – Air Quality Index (AQI) ah Aizawl chu January khan AQI hi 65 a ni a, February leh March ah 85 ni chhoin, April 10 atang phei chuan 100 chunglam kaiin 150 te a ni a, a san ber lai chuan 216 a kai pha. Nikum lam nen khaikhinin AQI hi kuminah a sang nasa hle a. Nikumah a san ber laiin AQI hi 104 a ni a, kuminah chuan 216 a kai tawh a, a let aia tamin a pung a ni.
“Tunhnaia kan boruak dinhmun hi AQI zat atanga en chuan, Level-3 (moderately polluted category) ah kan awm mek a, a tlangpuiin good category a awm thin kan ni a, engemaw lai phei chuan khawpui boruak fai ber nihna pawh kan hauh a, tunah erawh a bawlhhlawh chak hle niin a lang. Kan khawpui zimtea lirthei pun chak dan ngaihtuah te, bawlhhlawh hal leh lo hal, ram kang thlenga a la nasat dan ngaihtuah hian thil mak a ni lo,’ MPCB chuan a ti.
Boruak chhia kan pek chhuah nasat avangin boruaka bawlhhlawh chambangten ni zung lumna an hup bet a, chu chuan boruak a tilum zual ta em em thin tih sawiin, ‘Van thiang kek kawk hmuh tur a awm mang lo a, a paw chuk mai a ni. He boruak paw chuk hi boruak bawlhhlawh a ni a, chu chuan min up ta a. Hetia lo lum ta em em hi greenhouse effect an tih chu a ni,’ a ti bawk.
Nikum lam nena khaikhinin, khaw lum dan pawh a danglam chho nasa hle tih MPCB hotute hian an sawi. Nikum April khan a lum lai berin 27.24 degree Celsius a ni a, kumin April-ah erawh 34.16 degree C a kai. Nikum lam nen a san ber lai inthlauhna hi 6.92 degree C a ni tawh a. A la san chhoh zel a rinawm tih an sawi.
‘Data atanga a lan danin, boruaka bawlhhlawh a puna AQI a san apiangin khua a lum zual niin a lang a. Kumin bikah chuan April 5-ah AQI 58 a nihin khaw lum dan chu 25.15 degree C a ni a, a tuk April 6-ah AQI 119-ah kai dawrhin, khaw lum lam pawh 29.15 degree C niin, 4 degree C-in lumna a sang tihna a ni. AQI-in san lam a pan hret hret a, khua pawhin lum lam a pan ve hret hret zel a; April 1-ah AQI 30 ni kha April 17-ah chuan 187 (level 3) ni chhoin, khaw lum lam pawh 20.27 degree C atangin 34.16 degree C a kai a ni,’ a ti.
Sik leh sa inthlak danglam avangte, thal khawro leh ruahtui tlak loh avangte leh chhan dang avangte in khua in lum lam a pan zel rualin, boruak tihbawlhhlawh hian khaw lum a belchhah hle tih MPCB chuan an sawi. ‘Kan ramah chuan boruak bawlhhlawh pechhuak nasa industry lian kan nei meuh loa, chutihrualin lirthei pung chak lutuk leh enkawl that tawk loh avangin boruak kan tibawlhhlawh nasa hle tih chiang takin a hriat theih. Boruak chhe zel tur leh khaw lum nasa zual zel veng turin lirthei chelek tlem ila, a hun taka pollution test tirin boruak chhia a pek chhuah nasat lohna’n kan lirthei enkawl tha ila, boruak chhia eiral turin thing phun uarin ramngaw humhalh tha ang u. Ram tikang lo tur leh bawlhhlawhte hal lo turin mipuite kan inngen a ni,’ an ti.