Nikum final rematch: Sabalenka vs Pegula

Nikum final rematch: Sabalenka vs Pegula
2024 US Open final-a lo intum tawh Aryna Sabalenka leh Jessica Pegula-te chu kumin semi-final pakhat zawkah an intawng nawn leh dawn.
Thla 12 kalta khan Belarusian hian a career-a US Open title a lak vawikhatna ni turin final-a a khingpui American lakah 7-5 7-5 hnehna a chang a, kumin hian Pegula chuan phuba lak a chak khawp ang le!
Thawhlehni zan Flushing Meadows, New York-a quarter-final pakhatah defending champion Sabalenka leh Marketa Vondrousova inkhel tur an nih laiin unseeded Czech Vondrousova hi khup hliam avangin a inhnukdawk a, world number one Sabalenka chuan thlantla loin last four a lut.
2023 Wimbledon champion Vondrousova kha a career-ah hliamin a tibuai ve chamchi a; Thawhlehni zanah pawh khelmual luh a tum ve ngar ngar nain inkhel tan hma darkar hnih tling tawh loah a theih ngang loh avangin a inhnukdawk ta a ni.
Sabalenka chuan social media kaltlangin a tumpui tur thei leh ta lo pawi a tihpui thu ziakin, hmuhnawm leh ropui taka tennis khel thin a nih thu leh a hun tawn nat turzia a hriatthiampui thu a sawi.
Vondrousova hian pre-match practice session pawh a tan thei ngei a, mahse, rei intilum hman loin baseline-ah a thusawp a, a team lamin an hnem zui mawlh mawlh!
World number 60 hi a hnu lawkah a ke veilam tuam luk chungin Flushing Meadows players’ area lamah a herliam ta a ni!
A hnua thuchhuah a siamah Vondrousova chuan, “Vawiin hian court thleng turin ka theihtawp chu ka chhuah ve ngei a, mahse, tournament doctor ka rawn hnuah ka hliam tihpunlun theihna risk a san avangin ka inhnuhdawh a ngai a, min thlawpnaa lawmthu sawi chungin kan inkhel en tuma lo chhuak fans chungah thupha ka chawi e,” a ti.
Quarter-final inkhel dangah fourth seed Pegula chuan Barbora Krejcikova laka 6-3 6-3 hnehna nen kum zawnin last four a lut a, two-time Grand Slam singles champion Czech Krejcikova aia lian zawk, nikum final-a a ngam loh Sabalenka lakah thaba sut a tum dawn!
American Pegula hian inbuatsaihna chhe tak nen New York a thlawklut a; a tournament khelh hnuhnung paliah match hnih chiah chakin, a inbuatsaih dan en kha chuan heti chen chen hi a thleng zo lo palh mai ang tih hlauhthawnna a lian hman a, mahse, Mayar Sharif, Anna Blinkova, Victoria Azarenka leh Ann Li-te a paltlang vek hnuah Belarusian laka phuba ngaihven turin semi-final a chuangkai leh ta tho a ni.
Tunhma lamin Pegula hi major tournament quarter-final stage-ah a talbuai rei hle a, Grand Slam singles draw last eight-a vawi ruk ngawt a tlawm hnuah nikum khan tlang nawlhin US Open final a lut a, tuntum pawh hian a hmaa Sabalenka a din miau avangin a awhna ngaiah bawk khan talawk chhunzawm leh tura ngaih a ni rih phawt!