Nikum final rematch: Swiatek vs Gauff

Nikum final rematch: Swiatek vs Gauff
Thawhtanni khan Roland Garros-a 2023 French Open hmeichhe singles khelh mekah nikum final-a intum tawh American sixth seed Coco Gauff leh defending champion Iga Swiatek chuan fourth round match-a an tumpui ve ve hnehin quarter-final an lut a, semi-final luh inchuhin an inhmachhawn zui leh dawn.
Nikum French Open runner-up Coco hian Slovakian Anna Ka-rolina Schmiedlova lakah 7-5, 6-2 hnehna changin, champion lai Swiatek nena nikum final ‘re-match’ khel thei turin hmalam a pan.
American tleirawl kum 19 mi Gauff hian tunhma lamin Schmiedlova hi tum khat a lo hmachhawn tawh a, chu chu nikum Madrid tournament kha niin, tah pawh khan a lo chak tawh a, tuntum pawh hian world number 100-na luahtu Slovakian lakah chungnung zawk nihna a chang leh.
Kum 28 Schmiedlova tan tun hi major tournament-a chawlhkar hnihna a thlen tumkhatna niin, a tum a ruh ve bawk a, 5-2 laia a hnufual hnuah beiletin Gauff tan first set awlsam lo tak a chhawpchhuak.
Tleirawl Gauff tan tun hi a zawna kum thum lai French Open quarter-final a luhna ni tawhin, nikum khan Roland Garros-ah hian a career-a a vawikhatna atan Grand Slam singles final a khel a, a tumpui Swiatek chuan 6-1 6-3-in a sawp kha a ni a, tuntum final rematch-ah hian Pole lakah phuba la thei tak ang maw?
Fourth round match inkhel dangah set khatnaa champion lai Iga Swiatek laka 5-1-a a hnufual laiin damsam lohna avangin Ukrainian kum 34 mi Lesia Tsurenko a inhnukdawk a, nuamsa zawkin Polish world number one-in Roland Garros last eight a lut.
Kum 22 mi Swiatek hian Paris clay-a a title pathumna tur a beisei leh mekna kawngah nikum final-a a sawp hrep hnu American mihang tleirawl a tum leh dawn a, semi-final lut tura rinkai zawk a ni leh.
Kumin March thla pawh khan rilru lama harsatna (panic attack) a neih avangin world number 66 Tsurenko hi Belarusian Aryna Sabalenka nen an inkhelh laiin a lo inhnukdawk tawh a; tuntum hian thawk lamah harsatna a nei tih sawiin, a blood pressure pawh a che a, court chhungah doctor-in en ngial mah se a khelh chhunzawm thei ta chuang lo a ni.
Last 4 luh inchuh match dangah Tunisian world number seven Ons Jabeur pawhin 6-3, 6-1-in American Bernarda Pera a hneh a, a vawikhatna atan Roland Garros quarter-final a lut ve bawk.
Seventh seed Jabeur hi kumin kumtir lam khan a khup hliam tenau zai a ni a, Char-leston lamah inlanin, a champion-na kawngah a chawn a tina leh a, French Open inbuat-saihna Madrid Open pawh a khelh theih loh phah a, Paris-ah a inlan a, tun thlengin taksa lamah harsatna lian a la tawk lo.
Kum 28 mi Arab player hian kum 2019 khan world number 36 Pera hi Guangzhou hardcourt-ah a hneh lo a, Paris-ah erawh Jabeur a dingchang ta zawk a ni.
Nikum Wimbledon leh US Open final khel chunga Grand Slam title la hlawh-chhuak ve lo African hmeichhe tennis player zinga thleng sang ber Ons Jabeur hi kum 2022 Roland Garros first round paltlang zo loin a tla a, kuminah a vawikhatna atan French Open quarter-final a lut a, 6-7 (3-7) 6-3 7-5-a Spaniard Sara Sorribes Tormo hnehtu Brazilian 14th seed Beatriz Haddad Maia nen semi-final luh an inchuh ang.
Ti hi chuan, Jabeur hian Grand Slam paliah quarter-final a lut kim ta a, major quarter-final luh kim chung-changah chuti lam a lo ngaihtuah ngai lem loh thu leh a hmachhawp lam semi-final leh final luh kim lam a tinzawn chhoh tur thu a sawi.