Nikum State Day of Prayer aiin kuminah thahnem
Kumina Aizawl-a State Day of Prayer neihah nikum aiin tel an thahnem zawk tih sawi a ni.
February 20-a State Day of Prayer 2026 neih tak thlirletin Nilaini khan Aizawlah State Day of Prayer Committee an thukhawm a. Report pek danin, a hun pui ber Aizawl Lammualah hmanah nikum aiin tawngtai tura kalkhawm an thahnem zawk a, kalkhawmten thahnemngai taka Pathian auin an tawngtai tih sawi a ni. Zingkar atangin Bethel Lungphun Chaltlangah, Chaltlang Kohhran leh State Day of Prayer Committee ten tawngtaina hun an hmang a. Mission Veng, Chaltlang leh Vaivakawn atangin ‘Tawngtai Kawngzawh’ neih a ni tih sawi a ni.
Mizoram district hrang hranga State Day of Prayer hman thu report a ni bawk a. Mamitah chuan Siamliana Hall-ah hun hman a ni a, mi 300 chuang an kalkhawm. Serchhipah New Serchhip YMA Hall-ah hun hman a ni. Siaha-ah chuan Siaha Viahpi Field-ah State Day of Prayer hi hman a ni a, kohhran hrang hrang hruaituten hun inhman chhawkin mipui tam tak an kalkhawm. Saaitualah chuan Saitual Public Playground-ah hun hman a ni a. Saitual district-a khaw hrang hrang 40-ah he hun hi hman a ni. Khawzawlah chuan Khawzawl Sub-Headquarters YMA Field-ah hman a ni a, session hniha thenin NGO hrang hrang nen inlungrual takin hun an hmang a ni.
Champhaiah chuan New Champhai Field-ah State Day of Prayer hi hman a ni a, Headquarters atangin Upa PC Biaksiama’n hun a hmanpui a, tawngtai leh zaikhawmin hun hman a ni. Lungleiah chuan Saikuti Hall-ah session thum hman a ni a. Headquarters atangin Upa Dr R Vanlalzauva’n hmanpuiin, mi 500 chuang an kalkhawm.
Hnahthialah chuan Hnahthial Kohhran Joint Committee bultumin Hnahthial BCM biak in-ah hman a ni a, session hniha thenin kohhran hruaitu hrang hrangin hun an hmang. Kolasibah chuan Deputy Commissioner Office kawtzawlah hman a ni a, tawngtai thupui 9 hmangin tawngtai a ni a, special item neiin hun hman a ni.
Heng bakah hian RD Block/BDO thuthmun hrang hrang – Aibawk, Khawbung, Bilkhawthlir, Tlangnuam, Lungsen, West Phaileng, Phullen, Tuipang, Ngopa leh Reiekah State Day of Prayer hi an hmang a. Kum dangah chuan district headquarters lamah a tam thei ang ber headquarters lamin hun hmanpui theih nise, tiin State Day of Prayer Committee hian a rel a ni.