Nikum World Cup laia Messi kawr hak pasarih lilam dawn

Nikum Qatar ram World Cup-a Argentina captain Lionel Messi jersey hak zinga paruk kha an lilam dawn.
Argentina hero khan football-a chawimawina a la dawn loh awmchhun World Cup trophy lain Argentina a champion-pui a; Arab ram tournament chhung khan hun pangngaiah goal hnih thunin, final match-a France an hnehna penalty shootout-ah khan goal khat a chhuihlut bawk.
New York khaw lilamna ngaihven hlawh tur hi Sotheby’s huaihawt tur niin, kum 36 mi Messi shirt an lilam tur zingah hian final match-a a kawr hak kha a tel a, a lo berah pawh kha kawr bikah khan pound mak-taduai riat chuang hmuhchhuah theih an inbeisei.
Tun thlenga game khelh laia kawr hak lilam tawha mite chhan sanber chu nikuma Diego Maradona ‘Hand of God’ jersey an hralh kha niin, pound maktaduai 7.1 zetin an lei a, kha record ding lai kha Messi hian a khum theih rin a ni.
Sotheby’s head of modern collectibles Brahm Wachter chuan Messi World Cup kawr paruk an zawrhchhuah tur hi auction history-a langsar fal nalh tur a nih thu a sawi.
Wachter chuan, “2022 Fifa World Cup kha sports history-a inelna lian leh ropuiberte zinga pakhat niin, Messi zinkawng ropuina vawrtawp nen a inzawm a, footballer piang chhuak tawh zinga ropuiber a nihna nemnghettu pawimawh a ni,” a ti.
Ballon d’Or chawimaiwna vawiriat dawng thei awm-chhun Messi hi World Cup history-a tournament khat chhunga group stage, last 16, quarter-final, semi-final leh final thlenga goal khung kim vek thei awmchhun a ni!
2022 World Cup-a Argentina match khelh pasarihah khan captain Messi inlan kim vekin, tuna an zawrhchhuah turah hian group stage-a a kawr hak pathum zinga pahnih chauh a tel dawn a, a chhan chu a kawr hak pakhat kha Australia squad member Cameron Devlin nen an inthleng vang a ni.
Messi thuam an zawrh chhuah turte hi New York khawpuia Sotheby’s head-quarters-a chhang turte in-puahchah (bidding process) laiin public exhibition-ah a thlawna thlir theih a ni dawn a, bidding process hian kumin November ni 30 atanga December ni 14 chhung a awh ang.
Sotheby’s thuchhuah chuan Messi kawr an lilamna atanga an sum hmuh thenkhat hi Leo Messi Foundation thlawpnain Sant Joan de Deu (SJD) Barcelona Children’s Hospi-tal-in a kalpui mek Unicas Project hnena chhunluh a nih tur thu a tarlang a, natna vang bik veite mamawh phuhruk-na’n an hmang dawn a, a naupan laia natna vang tak lo vei ve tawh Messi vangin naupang vanduai engemawzat an nihlawh dawn a ni.